Bu ssenarilər Kremlin daxili auditoriyaya və radikal tərəfdarlarına göndərdiyi siyasi mesaj kimi qiymətləndirilir...




 
Rusiyalı iş adamı Konstantin Malofeyev və "rus dünyası" ideoloqu Aleksandr Duqin Sankt-Peterburq Beynəlxalq İqtisadi Forumunda Rusiyanın 2036 və 2050-ci illərə qədər inkişafı ilə bağlı bir neçə ssenari təqdim ediblər. 
 
Moderator.az xəbər verir ki, bu barədə Amerikanın Müharibənin Öyrənilməsi İnstitutunun (ISW) hesabatında deyilir.
 
Kremlin informasiya oyunu
 
ISW analitikləri hesab edir ki, bu cür bəyanatlar Kremlin informasiya strategiyasının bir hissəsi ola bilər. Təqdim olunan "müsbət" ssenaridə Rusiyanın Kiyev, Odessa, Xarkov və digər Ukrayna şəhərlərini ələ keçirməsi, həmçinin Avropa İttifaqının dağılması proqnozlaşdırılır. "Mənfi" ssenari isə Rusiyanın müharibədə məğlub olması, Ukraynanın NATO-ya qoşulması və Moskvanın postsovet məkanındakı təsirini itirməsini nəzərdə tutur.
 
Nüvə silahı ilə bağlı mesaj
 
Analitiklərin diqqətini daha çox "ətalət ssenarisi" cəlb edib. Həmin variantda cəbhədəki vəziyyət dəyişməz qalsa, Rusiyanın nüvə silahından istifadə edə biləcəyi ehtimalı qeyd olunur. ISW hesab edir ki, bu qədər radikal və reallıqdan uzaq ssenarilərin məqsədi Vladimir Putini daha "mötədil" və "rasional" lider kimi göstərməkdir. Ekspertlərin fikrincə, Kreml bir tərəfdən müharibənin davamını tələb edən ultramillətçi dairələrin gözləntilərini nəzərə alır, digər tərəfdən isə döyüş meydanındakı real imkanlarla hesablaşmağa məcburdur.
 
Ukrayna zərbələri forumun fonunu dəyişdi
 
ISW-nin hesabatında qeyd olunur ki, iqtisadi forumun açılışı Rusiyanın dərinliklərində yerləşən hərbi və enerji obyektlərinə Ukraynanın endirdiyi zərbələrlə eyni vaxta təsadüf edib.
 
Ukrayna Silahlı Qüvvələrinin Baş Qərargahının məlumatına görə, Kronştadtda yerləşən "Boykiy" korveti, "Peterburq Neft Terminalı", eləcə də Kronştadt Dəniz Zavodu və Miçurinsk şəhərindəki "Proqress" müəssisəsi hədəfə alınıb. Rusiya rəsmiləri bu məlumatları rəsmi şəkildə təsdiqləməyiblər.
 
Analitiklərin qənaətinə görə, Rusiyanın neft infrastrukturlarına qarşı son hücumlar ölkənin neft ixracına və emal sənayesinin fəaliyyətinə getdikcə daha ciddi təsir göstərir. Bu isə Kremlin ənənəvi olaraq iqtisadi dayanıqlıq və beynəlxalq nüfuz nümayiş etdirmək üçün istifadə etdiyi Sankt-Peterburq forumunun yaratmağa çalışdığı görüntünü kölgə altına salır.
 
Müharibənin gələcəyi
 
Ekspertlər qeyd edirlər ki, Kreml hələ də Ukrayna ilə bağlı maksimalist məqsədlərindən imtina etdiyini göstərmir. Bununla yanaşı, Rusiyanın özündə də Moskvanın elan etdiyi hədəflərə nə dərəcədə nail ola biləcəyi və bunun hansı bədələ başa gəldiyi barədə müzakirələrin artdığı bildirilir. Son aylarda Rusiya mediasında və ekspert dairələrində Kremlin bütün məqsədlərinə çatmasının real olub-olmamasını sual altına alan materialların sayı nəzərəçarpacaq dərəcədə çoxalıb.