Almaniya tarixində ilk dəfə BMT Təhlükəsizlik Şurasının qeyri-daimi üzvü seçilməyib, ölkəni səsvermədə Portuqaliya və Avstriya qabaqlayıb...




 
Gözlənilməz nəticə
 
Moderator.az xarici mətbuata istinadla xəbər verir ki, BMT Baş Assambleyasında keçirilən gizli səsvermənin nəticələrinə əsasən, Almaniya 2027-2028-ci illər üçün BMT Təhlükəsizlik Şurasının üzvlüyünə seçilə bilməyib. Portuqaliya 134, Avstriya isə 131 səs toplayaraq tələb olunan həddi keçib. Almaniya isə cəmi 104 səs əldə edib və kənarda qalıb. Bu, Almaniyanın tarixində ilk belə uğursuzluq hesab olunur. Ölkə daha əvvəl altı dəfə Təhlükəsizlik Şurasının qeyri-daimi üzvü olub.
 
Berlində tənqidlər başladı
 
Nəticədən sonra Almaniyada hökumətin xarici siyasəti ilə bağlı tənqidlər səslənməyə başlayıb. Bundestaqda "Yaşıllar" partiyasının müdafiə məsələləri üzrə eksperti Aqneşka Brugger məğlubiyyətə görə kansler Fridrix Mers və xarici işlər naziri Johann Vadefulun məsuliyyət daşıdığını bildirib.
 
Onun fikrincə, Berlin namizədliyini kifayət qədər fəal təşviq etməyib və beynəlxalq arenada iqlim siyasəti, inkişaf əməkdaşlığı və qaydalara əsaslanan dünya nizamının müdafiəsi kimi məsələlərdə əvvəlki təsirini göstərə bilməyib.
 
Təhlükəsizlik Şurasında dəyişikliklər
 
BMT Təhlükəsizlik Şurası veto hüququna malik beş daimi üzvdən - ABŞ, Rusiya, Çin, Birləşmiş Krallıq və Fransadan, həmçinin on qeyri-daimi üzvdən ibarətdir. Qeyri-daimi üzvlərin yarısı hər il ikiillik müddət üçün yenidən seçilir.
 
Bu arada Baş Assambleyanın sədri vəzifəsini icra edən Almaniyanın keçmiş xarici işlər naziri Annalena Berbokun də sentyabr ayında postunu tərk edəcəyi açıqlanıb. Onu Banqladeşdən olan diplomat
Xalilur Rahman əvəz edəcək.
 
Beləliklə, son günlər BMT strukturlarında Almaniya üçün ardıcıl iki uğursuz nəticə qeydə alınıb ki, bu da ölkənin beynəlxalq nüfuzu ilə bağlı müzakirələri yenidən gündəmə gətirib.