"Süni intellekt və texnologiya səhmlərinin yüksəlişi qlobal sərvəti rekord həddə çatdırıb, varlılarla kasıblar arasındakı uçurum dərinləşir..."
Süni intellekt sahəsindəki inkişafla bağlı gözləntilər və fond bazarlarındakı nikbinlik dünyada sərvətin rekord səviyyəyə yüksəlməsinə şərait yaradıb.
Moderator.az xəbər verir ki, bu barədə "bloomberg.com" nəşri yazıb.
Süni intellekt sərvət artımının əsas mühərrikinə çevrilib
Nəşr yazır ki, bir il ərzində milyonçuların sayı təxminən 2 milyon nəfər artıb. "Capgemini" Konsaltinq şirkətinin hazırladığı "World Wealth Report" hesabatına görə, 2025-ci ildə investisiya aktivlərinin dəyəri 1 milyon dollar və ya daha çox olan insanların ümumi sərvəti təxminən 9 faiz artaraq 98,3 trilyon dollara çatıb.
Müqayisə üçün qeyd olunur ki, dünya üzrə ümumi daxili məhsulun həcmi 2024-cü ildə 111 trilyon dollar təşkil edib.
Hesabat müəllifləri bildirirlər ki, süni intellekt texnologiyalarına yatırımların artması fond bazarlarını gücləndirib və nəticədə dünyada milyonçuların sayı tarixdə ilk dəfə 25,3 milyon nəfərə yüksəlib.
ABŞ, Yaponiya və Çin liderlik edir
Ən böyük artım ABŞ-da qeydə alınıb. Son bir ildə burada 736 min yeni milyonçu meydana çıxıb və ölkədə milyonçuların ümumi sayı 8,7 milyona çatıb. Xüsusilə aktivləri 30 milyon dollardan artıq olan ultra-varlı insanların sayı sürətlə artır. Hazırda dünyada belə şəxslərin sayı 250 min nəfərə çataraq yeni rekord müəyyənləşdirib.
Asiya-Sakit okean regionu isə sərvət artımının tempinə görə bütün digər bölgələri geridə qoyub. Burada ümumi kapital 10,5 faiz artıb. Ekspertlər bunu ilk növbədə yarımkeçiricilərə və yüksək texnologiyalı məhsullara artan tələbatla əlaqələndirirlər.
Yeni milyonçuların sayına görə Yaponiya və Çin ön sıralarda yer alır. Bir il ərzində Yaponiyada 436 min, Çində isə 154 min yeni milyonçu ortaya çıxıb. Avropada da varlı insanların sayı 6,5 faiz artıb ki, buna inflyasiyanın zəifləməsi və maliyyə bazarlarının sabitləşməsi təsir göstərib.
Sərvət artır, bərabərsizlik də dərinləşir
Hesabatda qeyd olunur ki, qlobal sərvətin artması ilə yanaşı, varlılarla kasıblar arasındakı fərq də genişlənir. Məlumata görə, 2025-ci ilin sonuna ABŞ-da ən zəngin 1 faiz ailə ölkənin ümumi sərvətinin təxminən 32 faizinə nəzarət edib. Bu, 1989-cu ildən bəri ən yüksək göstəricidir.
Ekspertlər maliyyə axınlarında da ciddi dəyişikliklərin baş verdiyini vurğulayırlar. Son üç ildə ən azı 1,5 trilyon dollar ənənəvi maliyyə institutlarından ailə investisiya ofislərinə və broker şirkətlərinə yönəlib. Mütəxəssislərin fikrincə, süni intellekt bumu artıq təkcə texnologiya sektorunu deyil, qlobal kapital bölgüsünü də dəyişdirir.
Süni intellektlə əlaqəli şirkətlərin səhmlərinin bahalaşması yeni milyonçular və milyarderlər yaradır. Bununla yanaşı, sərvətin getdikcə daha kiçik bir qrupun əlində cəmləşməsi iqtisadi bərabərsizlik problemini yaxın illərin əsas mövzularından birinə çevirir.
