ABŞ-da bir sahibkar dörd mərtəbəli, alüminiumdan hazırlanmış üzən tikilini satışa çıxarıb. Gəminin bütün damı kənardan kənara günəş panelləri ilə örtülüb. "Shine Down” adlı gəminin uzunluğu 36 metrdir, suya oturma dərinliyi isə təxminən 2 metrdir.
Məqalə müəllifi Con Consonun yazdığına görə, gəminin sahibi həm mühəndis, həm də dizayner olaraq tam müstəqil üzən bir struktur yaratmağı qarşısına məqsəd qoyub. O, xarici enerji şəbəkəsinə ehtiyac duymadan öz elektrikini istehsal edən və istədiyi zaman müstəqil hərəkət edə bilən bir yaşayış platforması hazırlayıb.
"Shine Down” dünyanın ən dəqiq planlanmış üzən yaşayış məkanlarından biri hesab olunur. O, alüminium işçi gəmiləri istehsal edən "Breaux Brothers Enterprises” şirkəti tərəfindən inşa edilib. Şirkət adətən neft yataqları üçün təchizat gəmiləri, ekipaj daşıyan katerlər, pilot və patrul gəmiləri istehsal edir və bu məhsullar sənayedə yüksək keyfiyyəti ilə tanınır.
Bu layihə isə "Breaux Brothers Enterprises” üçün lüks yaşayış gəmisi sahəsində ilk təcrübədir. Layihə ənənəvi superyaxta sifarişi deyil, birbaşa sahibin konsepsiyası, mühəndis həlli və dizaynı əsasında hazırlanıb.
Suda "Shine Down” daha çox yaxta deyil, memarlıq obyekti kimi görünür. Gəmi iti burunlu klassik yaxta formasında deyil, adi bina formasında dizayn edilib. Alüminium korpus mavi su xətti zolağı ilə boyanıb, üst hissə isə işçi barja üslubunda hazırlanıb. Üstündə ağ çərçivəli və döşəmədən tavana qədər şüşəli dörd yaşayış mərtəbəsi yerləşir, balkonlar isə bütün göyərtələri əhatə edir. Ümumilikdə ən azı 108 günəş paneli quraşdırılıb.
İçəridə beş yataq otağı və yeddi vanna otağı var. Qastronomik mətbəx mərtəbələr arasında yemək daşınması üçün liftlə təchiz edilib. Açıq sahələr həm əyləncə, həm də baxış platforması kimi istifadə olunur. Arxa göyərtədə hovuz yerləşir.
Yaşayış mərtəbələrinin altında isə tam muxtariyyət üçün nəzərdə tutulmuş texniki sistemlər var. Burada tam təchiz olunmuş mexaniki emalatxana, suyun hazırlanması və saxlanması sistemi, eləcə də qapalı qaraj yerləşir.(Qaynarinfo)
