"ABŞ, Kanada və Meksikanın ev sahibliyi etdiyi mundial tarixdə rekordlarla başlayır..."
 




Futbol üzrə dünya çempionatı iyunun 11-də start götürür və iyulun 19-da ABŞ-ın İst-Raterford şəhərində final oyunu ilə başa çatacaq.
 
Moderator.az xəbər verir ki, bu barədə "bbc.com" nəşri yazıb.
 
Tarixin ən böyük mundialı
 
Turnir 1 aydan çox davam edəcək və ilk dəfə üç ölkədə - ABŞ, Kanada və Meksikada keçiriləcək. Bu mundial həm formatına, həm də miqyasına görə tarixdə rekord sayılır. 1930-cu ildə ilk turnirdə cəmi 13 komanda iştirak etmişdi. Bu dəfə isə onların sayı 48-ə çatıb və ümumilikdə 104 oyun keçiriləcək.
 
Yeni formatda komandalar 12 qrupa bölünüb. Hər qrupdan ilk iki yerin sahibi və ən yaxşı üçüncü yerlərdən 8 komanda pley-off mərhələsinə yüksəlir. Bu dəyişikliklər turniri daha geniş, amma eyni zamanda daha mürəkkəb edib.
 
Favoritlər və ulduzlar
 
Turnirin əsas favoritləri kimi Argentina, Fransa, İspaniya, İngiltərə və Braziliya göstərilir. Onların ardınca Almaniya, Niderland və Portuqaliya gəlir. Argentina Lionel Messi ətrafında formalaşmış güclü heyətlə diqqət çəkir. 
 
Fransa Kilian Mbappe başda olmaqla ən dərin heyətlərdən birinə malikdir. İspaniya isə gənc və təcrübəli futbolçuların balansı ilə seçilir. Portuqaliya üçün bu mundial Kriştianu Ronaldonun son böyük turniri ola bilər. 41 yaşlı futbolçu hələ də millinin əsas simasıdır.
 
Sürprizlər və iştirak edə bilməyənlər
 
Mundialda diqqət çəkən debütantlardan biri Özbəkistandır. Komandanın heyətində "Mançester Siti"nin müdafiəçisi Əbdülqodir Xusanov da yer alır. Norveç isə Erlinq Holannın ilk dünya çempionatı ilə maraq doğurur.
 
Kürasao, Haiti, İordaniya və Kabo-Verde kimi yığmalar da turnirin sürpriz iştirakçılarıdır. Digər tərəfdən, İtaliya yenə mundiala vəsiqə qazana bilməyib. Danimarka və Nigeriya da turnirdən kənarda qalıb. Robert Levandovski, Xviça Kvaratsxeliya və bir sıra ulduz futbolçular da mundialı buraxacaq.
 
Messi, Ronaldo və turnirin kölgəsində qalan problemlər
 
Bu mundial bir çox əfsanəvi futbolçu üçün son ola bilər. Lionel Messi və Kriştianu Ronaldo ilə yanaşı Luka Modriç, Manuel Noyer, Məhəmməd Salah, Son Hın Min və Kevin de Brüyne kimi ulduzların da son turniri kimi dəyərləndirilir.
 
Turnir həm də futbol kənarı məsələlərlə gündəmdədir. ABŞ, Kanada və Meksika arasında siyasi gərginliklər, ABŞ-ın viza siyasəti və bəzi ölkələrə məhdudiyyətlər müzakirə doğurub. İran yığmasının iştirakı bir müddət sual altında qalsa da, sonda komandanın mundiala qatılacağı təsdiqlənib. 
 
Konqo Demokratik Respublikasında Ebola virusu ilə bağlı narahatlıqlar da olsa, turnirin iştirakına ciddi maneə yaranmayıb. Beləliklə, bu mundial həm rekordları, həm ulduzları, həm də meydandan kənar mübahisələri ilə tarixə düşməyə hazırlaşır.