Sankt-Peterburq forumu fonunda Rusiyanın "yumşaq güc" imkanlarının zəiflədiyi və Qərb auditoriyasına təsir qabiliyyətinin azaldığı iddia olunur...




 
Sankt-Peterburqda keçirilən beynəlxalq iqtisadi forum Kremlin Rusiya təbliğat sisteminin son onilliklərdə ciddi şəkildə zəiflədiyini ortaya qoyub.
 
Moderator.az xəbər verir ki, bu barədə Britaniyanın "The Telegraph" nəşri yazıb.
 
Sovet dövrü ilə müqayisə və təbliğatın zəifləməsi
 
Məqalədə bildirilir ki, Sovet İttifaqı dövründə Moskva Qərb dünyasında təsir yaratmaq üçün tanınmış yazıçılar, filosoflar və sənətçilərdən istifadə edirdi. Pablo Pikasso, Corc Bernard Şou, Con Steynbek, Andre Jid və Jan-Pol Sartr kimi simalar həmin dövrdə Sovet ideologiyasına simpatiya ilə yanaşan Qərb intellektualları kimi təqdim olunurdu. Həmin dövrdə SSRİ bu şəxslərin ölkəyə səfərlərini xüsusi şəkildə təşkil edir, onlara idarə olunan "təəssürat turları" göstərir və nəticədə onların bir qismi Qərbdə sovet sisteminin müdafiəçilərinə çevrilirdi.
 
Müasir Rusiyanın "yumşaq güc" problemi
 
Məqaləyə görə, müasir Rusiya bu modelə yaxın təsir mexanizmi formalaşdırmaqda çətinlik çəkir. Sovet dövründəki kimi yüksək nüfuzlu Qərb simalarının yerini bu gün daha çox mübahisəli və təsir gücü məhdud şəxslər tutur. Məqalədə qeyd olunur ki, Sankt-Peterburq forumuna gələn bəzi qonaqlar Qərb ictimaiyyətində geniş qəbul olunmuş fiqurlar deyil, əksinə, daha çox qalmaqallı və mübahisəli şəxslərdir.
 
Nümunə olaraq bəzi ictimai fiqurlar, keçmiş hərbçi və media simaları, eləcə də sosial media təsirçiləri göstərilir. Müəllifin fikrincə, bu şəxslər "Rus dünyası" ideologiyasının səmimi daşıyıcıları deyil, daha çox Kremlin Qərbə qarşı mövqelərinə paralel hərəkət edən simalardır.
 
Qərb təsirinin azalması və Putinin imici
 
Məqalədə qeyd olunur ki, 2022-ci ilə qədər belə Kremlin Qərbdə daha geniş siyasi dəstək spektri var idi. Bu sıraya bəzi Avropa siyasətçiləri də daxil edilirdi. Lakin hazırkı dövrdə Kremlin Qərbdə təsir göstərmək cəhdləri daha zəif və qeyri-effektiv görünür. Müəllifin fikrincə, bu, Rusiyanın "yumşaq güc" imkanlarının aşınmasının göstəricisidir.
 
Məqalənin yekununda bildirilir ki, Vladimir Putin daha çox təcrid olunmuş və təsir imkanları azalmış lider obrazında təqdim olunur. Kremlin Qərbdə dəstək göstərmək cəhdləri isə getdikcə daha süni və inandırıcılıqdan uzaq görünür.