"Avrooa İttifaqı Rusiyaya qarşı 21-ci sanksiyalar paketini hazırlayır, Ukraynaya qarşı döyüşmüş rusiyalıların Şengen zonasına girişinə qadağa da gündəmdədir..."
Avropa İttifaqının (Aİ) xarici siyasət və təhlükəsizlik məsələləri üzrə ali nümayəndəsi Kaya Kallas bildirib ki, Qərbin tətbiq etdiyi sanksiyalar Rusiyaya indiyədək 1-1,3 trilyon avro arasında ziyan vurub.
Moderator.az xəbər verir ki, bu barədə o, Lüksemburqda keçirilən Aİ Xarici İşlər Şurasının iclasından sonra keçirilən mətbuat konfransında danışıb. Məlumatı "dw.com" nəşri yayıb.
Yeni sanksiyalar hazırlanır
Kallasın sözlərinə görə, Avropa İttifaqı artıq Rusiyanın 34 fiziki və 47 hüquqi şəxsini əhatə edən əlavə məhdudiyyətlər qəbul edib. Bu tədbirlər Rusiya hərbi-sənaye kompleksinə, "kölgə donanması"na və Moskvanın hibrid təsir şəbəkələrinə qarşı yönəlib. O bildirib ki, paralel olaraq Rusiyaya qarşı 21-ci sanksiyalar paketi üzərində iş davam edir və onun iyul ayında qəbul olunması mümkündür.
Kallas vurğulayıb ki, hər yeni məhdudiyyət Rusiyanın manevr imkanlarını azaldır. Onun sözlərinə görə, sanksiyalar nəticəsində itirilən vəsait Ukraynaya qarşı müharibənin maliyyələşdirilməsinə yönəldilə bilməyib.
Ukraynada döyüşən rusiyalılara qadağa təklif edilir
Aİ-də müzakirə olunan yeni təşəbbüslərdən biri də Ukraynaya qarşı döyüşmüş Rusiya vətəndaşlarının Şengen zonasına girişinin qadağan edilməsidir. Estoniya xarici işlər naziri Marqus Tsahkna bildirib ki, söhbət 600 mindən çox rusiyalı döyüşçüdən gedir. Onun fikrincə, bu şəxslərin Avropaya gəlişi təhlükəsizlik riskləri yarada bilər.
Kaya Kallas isə qeyd edib ki, Aİ bu şəxslərin kimliyini müəyyən etməyə imkan verən kəşfiyyat məlumatlarına malikdir. Onun sözlərinə görə, məsələ yalnız Ukraynadakı müharibə ilə deyil, Avropanın öz təhlükəsizliyi ilə də bağlıdır.
Çin və Rusiya mədəniyyət nümayəndələri ilə bağlı açıqlamalar
Kallas həmçinin bildirib ki, Aİ Rusiyanın Ukraynaya qarşı müharibəsinə dəstək verdiyi iddia olunan bir sıra Çin təşkilatlarına qarşı da sanksiyalar tətbiq edib. O əlavə edib ki, Çin hərbçilərinin Rusiya ordusunun şəxsi heyətinə təlim keçməsi ilə bağlı məlumatlar diqqətlə araşdırılır.
Aİ diplomatiyasının rəhbəri Ukraynanın növbəti raket hücumuna məruz qaldığı gün Lüksemburqda çıxış edən rusiyalı opera müğənnisi Anna Netrebko barədə də danışıb. Onun fikrincə, Rusiya artıq illərdir mədəni irs obyektlərini hədəfə aldığı halda, Avropa rusiyalı mədəniyyət xadimləri üçün "qırmızı xalça sərməməlidir".
Bununla belə, Kallas qeyd edib ki, bu məsələ ilə bağlı ümumavropa qadağası yoxdur və qərarı hər bir üzv dövlət özü verir. O, bu mövzunun gələcəkdə Aİ səviyyəsində yenidən müzakirə oluna biləcəyini də istisna etməyib.
