G7 ölkələri ABŞ və İran arasında imzalanmış razılaşmaları dəstəkləyir və onların həyata keçirilməsini asanlaşdırmağa hazırdırlar.
Moderator.az xəbər verir ki, bu, Fransada görüşən G7 liderlərinin geosiyasi məsələlər üzrə birgə bəyanatında yer alıb:
"Yaxın Şərqdə artıq bir irəliləyiş və fürsət görürük. Prezident Donald Trampın qətiyyətli rəhbərliyi və vasitəçi ölkələrin dəstəyi ilə ABŞ və İran arasında əldə edilmiş və İranın nüvə silahı əldə etməsinin qarşısını almaq və onun regiondakı hərəkətləri və ballistik raketlərin inkişafı ilə bağlı təhdidlərini aradan qaldırmaq üçün tarixi bir fürsət yaradan razılaşmaların elan edilməsini alqışlayırıq. Biz razılaşmaları dəstəkləyirik və onların həyata keçirilməsinə töhfə verməyə hazırıq".
Sənəddə G7 ölkələrinin Livanda "təcili atəşkəs"ə, ölkə hökumətinin Hizbullah qüvvələrini tərksilah etmək səylərinə və "Livan ərazi bütövlüyünün və suverenliyinin müvafiq beynəlxalq təhlükəsizlik zəmanətləri ilə qorunmasına" dəstəyi vurğulanır.
