"Brüssel Rusiyanın idxal məhdudiyyətlərindən sonra İrəvana dəstək verməyə çalışır, Cənubi Qafqaz uğrunda rəqabət isə daha da kəskinləşir..."
Avropa İttifaqı (Aİ) Ermənistana təcili ticarət güzəştləri təqdim etməyə hazırlaşır. Məqsəd Rusiyanın erməni məhsullarına tətbiq etdiyi məhdudiyyətlərin təsirini azaltmaq və İrəvanın ixrac imkanlarını genişləndirməkdir.
Moderator.az xəbər verir ki, bu barədə "Financial Times" qəzeti məlumat yayıb.
Aİ Ermənistan uğrunda iqtisadi mübarizəni gücləndirir
Nəşr yazır ki, bu addım təkcə iqtisadi deyil, həm də siyasi əhəmiyyət daşıyır. Son illər Ermənistanın Qərblə yaxınlaşması fonunda Brüssel və Moskva arasında təsir uğrunda rəqabət daha da kəskinləşib. Aİ hesab edir ki, Rusiyanın ticarət məhdudiyyətləri İrəvana təzyiq vasitəsinə çevrilib və buna cavab olaraq Ermənistan iqtisadiyyatına əlavə dəstək göstərilməlidir.
Nəşrin yazdığına görə, Avropa Komissiyası Ermənistanın ərzaq və kənd təsərrüfatı məhsullarına tətbiq olunan tariflərin azaldılmasını nəzərdə tutan xüsusi ticarət tədbirləri hazırlayır. Brüsseldə hesab edirlər ki, Moskvanın son məhdudiyyətləri Ermənistanda qərbyönlü hakimiyyətə təzyiq göstərmək məqsədi daşıyıb.
Brüssel İrəvana dəstəyi artırır
Mənbələrin bildirdiyinə görə, hazırlanmaqda olan tədbirlər Rusiyanın qadağa tətbiq etdiyi təxminən 20 məhsul kateqoriyasının böyük hissəsini əhatə edə bilər. Söhbət illik dəyəri 420 milyon avroya çatan ixrac məhsullarından gedir. Aİ rəsmiləri hesab edirlər ki, Moskva gələcəkdə Ermənistana qarşı ticarət təzyiqini daha da gücləndirə bilər.
Bu səbəbdən Brüssel İrəvana alternativ bazarlara çıxış imkanları yaratmağa çalışır. Avropa Komissiyasının nümayəndəsi Olof Gill bildirib ki, yeni tədbirlər erməni şirkətlərinə Aİ bazarında yeni imkanlar açacaq və iqtisadiyyatın daha çox zərər çəkmiş sahələrinə dəstək verəcək.
Rusiya qadağaları və yeni problemlər
Rusiya son aylarda Ermənistanın bir sıra məhsullarının idxalına məhdudiyyətlər tətbiq edib. Qadağalar əvvəlcə güllərə, daha sonra mineral su, şərab, konyak, meyvə-tərəvəz və balıq məhsullarına şamil olunub. Parlament seçkiləri ərəfəsində Aİ Ermənistana 50 milyon avroluq yardım ayırdığını açıqlayıb, hətta Rusiyaya göndərilməsi nəzərdə tutulan minlərlə gülü almağa hazır olduğunu bildirib.
Bununla belə, ekspertlər hesab edirlər ki, Aİ-nin dəstəyi Rusiyanın Ermənistan ticarətindəki dominant mövqeyini tam əvəz edə bilməyəcək. Üstəlik, Ermənistanın dənizə çıxışının olmaması və məhsulların Gürcüstan və ya Türkiyə üzərindən daşınması əlavə çətinliklər yaradır. Nəşr qeyd edir ki, Ermənistan ətrafında yaranan vəziyyət Brüssel və Moskva arasında Cənubi Qafqaz uğrunda geosiyasi rəqabətin yeni mərhələyə keçdiyini göstərir.
