"ABŞ prezidenti Donald Trampın İtaliyanın baş naziri Corca Meloni barədə səsləndirdiyi fikirlər Vaşinqton və Roma arasında yeni diplomatik gərginliyə səbəb olub..."
 




İtaliyanın xarici işlər naziri Antonio Tayani iyunun 21-22-nə planlaşdırılan ABŞ səfərini ləğv edib. 
 
Moderator.az xəbər verir ki, bu barədə "dw.com" nəşri yazıb.
 
Diplomatik qalmaqal böyüyür
 
Nəşr yazır ki, buna səbəb ABŞ prezidenti Donald Trampın baş nazir Corca Meloni haqqında səsləndirdiyi fikirlər olub. Məsələ Trampın İtaliyanın La7 telekanalına verdiyi telefon müsahibəsindən sonra qalmaqala çevrilib. ABŞ lideri G7 sammiti zamanı Meloninin onunla şəkil çəkdirmək üçün guya "yalvardığını" iddia edib.
 
Bu açıqlama Romada ciddi narazılıqla qarşılanıb. Məsələ qısa müddətdə diplomatik böhran səviyyəsinə yüksəlib. İtaliya hakimiyyəti Trampın sözlərini təkcə baş nazirə deyil, bütün ölkəyə qarşı hörmətsizlik kimi qiymətləndirib. Nəticədə Vaşinqton və Roma arasında münasibətlərdə yaranmış gərginlik daha da dərinləşib.
 
"Nə mən, nə də İtaliya heç kimə yalvarmır"
 
Corca Meloni sosial şəbəkədə yaydığı videomüraciətdə Trampın sözlərini "tamamilə uydurma" adlandırıb. "ABŞ prezidentinin müttəfiqlərinə qarşı niyə belə davrandığını anlamıram. Amma bir şeyi yadda saxlamalıdır: nə mən, nə də İtaliya heç kimə yalvarmır", - deyə İtaliya hökumətinin başçısı bildirib.
 
Bunun ardınca xarici işlər naziri Antonio Tayani Trampın açıqlamalarını "ciddi və təhqiredici" adlandıraraq ABŞ səfərindən imtina etdiyini açıqlayıb. Nazir Mayamidə keçirilməsi nəzərdə tutulan İtaliya-Amerika biznes və investisiya forumunda iştirak etməli, həmçinin ABŞ dövlət katibi Marko Rubio ilə görüşməli idi.
 
Münasibətlərdə böhran dərinləşir
 
Nəşrin qeyd etdiyi kimi, Tramp və Meloni arasında gərginlik yeni deyil. Bu ilin yazında ABŞ prezidenti Roma Papası XIV Leonu da sərt tənqid edib, Meloni isə bu açıqlamaları "qəbuledilməz" adlandırıb. Sonradan Tramp İtaliya hökumətinin ABŞ və İsrailin İrana qarşı hərbi əməliyyatlarına qoşulmamasını da tənqid edib.
 
Analitiklərin fikrincə, son qalmaqal Vaşinqton və Roma arasındakı münasibətlərdə yaranmış böhranın növbəti mərhələsidir. Meloninin yaxın çevrəsindən olan rəsmilər isə hesab edir ki, Trampın Avropa liderlərinə qarşı davamlı hücumları ABŞ ilə Avropa arasında formalaşmış tarixi tərəfdaşlığa zərbə vurur.