Azərbaycanda ehtiyatda olan gizir və miçmanların yenidən orduya qayıtmaq qaydaları dəyişdirilib, xüsusi təyinatlı məktəb məzunları üçün isə ilk hərbi müqavilə müddəti 10 ilə qaldırılıb.
 




Moderator.az xəbər verir ki, Baş nazir Əli Əsədov bununla bağlı Nazirlər Kabinetinin “Bağlaşma əsasında həqiqi hərbi xidmətə daxilolmanın halları və Qaydası”nda dəyişiklik edilməsi haqqında Qərar imzalayıb.
 
Qərara əsasən, həqiqi hərbi xidmətdə olmağın son yaş həddinə çatmamış ehtiyatda olan gizirlər və miçmanlar bağlaşma (müqavilə) əsasında yenidən orduya və digər silahlı birləşmələrə könüllü xidmətə qəbul oluna biləcəklər. Eyni zamanda, bağlaşma əsasında könüllü xidmətə daxil olmaq hüququ olan ehtiyatda olan digər hərbi vəzifəlilərin çərçivəsi dəqiqləşdirilərək ehtiyatda olan əsgərlər, matroslar və çavuşlar kimi müəyyən edilib.
 
Sənədlə tətbiq edilən digər mühüm dəyişikliyə görə, hərbi qulluqçu hazırlayan xüsusi təyinatlı orta ixtisas təhsili müəssisələrini, habelə xarici ölkələrin analoji orta ixtisas təhsili müəssisələrini bitirmiş gizir və miçmanlar üçün ilk bağlaşma müddəti kəskin artırılaraq 10 il müəyyənləşdirilib. Digər sıravi gizir və miçmanlar üçün isə bu ilkin müddət əvvəlki qaydada, yəni 5 il saxlanılıb.
 
Qeyd edək ki, bu qərar "Hərbi xidmətkeçmə haqqında" Əsasnamə və "Hərbi vəzifə və hərbi xidmət haqqında" qanunlara edilmiş fundamental dəyişikliklərin icrasını təmin edir. Yeni tənzimləmə Silahlı Qüvvələrdə peşəkar gizir və miçman heyətinin xidmət müddətinin uzunmüddətli planlaşdırılmasına, dövlətin kadr hazırlığına çəkdiyi xərclərin səmərəliliyinə və ehtiyatda olan təcrübəli heyətin yenidən xidmətə qazandırılmasına xidmət edəcək.