Ukraynanın uzaqmənzilli dron və raket hücumları Rusiyanın hərbi logistikası, iqtisadiyyatı və Krımdakı mövqeləri üçün getdikcə daha ciddi təhdidə çevrilir...




 
Ukrayna son aylarda Rusiyanın arxa cəbhəsində yerləşən hərbi və strateji obyektlərə qarşı dron və raket hücumlarını əhəmiyyətli dərəcədə artırıb.
 
Moderator.az xəbər verir ki, bu barədə Almaniyanın "Bild" nəşri yazıb.
 
Nəşrin yazdığına görə, bu zərbələr Rusiya prezidenti Vladimir Putinin qarşısında eyni vaxtda dörd ciddi problem yaradıb.
 
Cəbhədə dalan vəziyyəti yaranıb
 
Müharibənin xarakteri getdikcə daha çox dronlar, raketlər və hava hücumundan müdafiə sistemləri ilə müəyyən olunur. 2023-cü ildən bəri cəbhə xəttində strateji dəyişiklik baş verməyib və tərəflər əsasən bir-birinin təchizat marşrutlarını, sursat daşımalarını, yanacaq təminatını və logistika qovşaqlarını hədəfə alırlar.
 
Tarixçi Yan Berendsin sözlərinə görə, cəbhənin mərkəzi hissəsində kilometrlərlə uzanan və dronların nəzarət etdiyi faktiki "boz zona" formalaşıb. "Bu sahədə Ukrayna müəyyən uğurlar əldə edir və Rusiya ordusuna ağır itkilər verir", - deyə o bildirib.
 
Hərbi logistika ciddi təzyiq altındadır
 
Ukrayna qüvvələri Rusiyanın neft emalı zavodlarına, yanacaq anbarlarına və dəmir yolu infrastrukturuna zərbələr endirməyə davam edir. Ekspertlərin fikrincə, bu hücumlar həm neft ixracına, həm də ölkə daxilində və cəbhədə təchizat sisteminə ciddi zərər vurur.
 
Stokholm Şərqi Avropa Araşdırmaları Mərkəzinin analitiki Andreas Umland hesab edir ki, son həftələrdə neft emalı və saxlama infrastrukturuna qarşı hücumların gözləniləndən daha effektiv olduğu üzə çıxıb. "Artıq Rusiyanın iqtisadi və sosial həyatı getdikcə daha böyük təzyiq hiss edir", - deyə ekspert qeyd edib.
 
Krımı qorumaq Kreml üçün siyasi yükə çevrilir
 
Hərbi ekspert Tomas Yeqerin fikrincə, Krım Putinin imperiya siyasətinin ən mühüm rəmzlərindən biridir. "İşğal altında olan Krım tədricən Rusiyadan təcrid olunur və vəziyyət dəyişir", - deyə o vurğulayıb.
 
Yan Berends hesab edir ki, Krımın itirilməsi Putin üçün ikiqat zərbə olacaq. Bir tərəfdən bu, uzun illər ərzində Kreml təbliğatının xüsusi əhəmiyyət verdiyi rəmzi məğlubiyyət sayılacaq. Digər tərəfdən isə yarımada Rusiyanın Qara dənizdəki əsas strateji dayaq nöqtələrindən biridir.
 
Müharibə milyonlarla rusiyalının gündəlik həyatına daxil olur
 
Ukraynanın həm Krıma, həm də Rusiyanın dərinliklərindəki hədəflərə endirdiyi zərbələr nəticəsində müharibənin təsirləri artıq ölkə daxilində daha aydın hiss olunur. Əgər əvvəllər müharibə bir çox rusiyalı üçün uzaq hadisə kimi görünürdüsə, indi onun iqtisadi və sosial nəticələri gündəlik həyatın bir hissəsinə çevrilir.
 
Andreas Umlandın sözlərinə görə, müharibə artıq "kompüter oyunu təsiri" yaratmır və milyonlarla insan üçün real həyat hadisəsinə çevrilib. Yan Berends isə əlavə edib: "Yanan Moskva görüntülərini görməməzlikdən gəlmək mümkün deyil. Ukraynanın seçdiyi taktika nəticə verir."
 
Ukrayna zərbələrinin miqyası artır
 
Amerikanın Müharibənin Öyrənilməsi İnstitutunun (ISW) məlumatına görə, Ukrayna qüvvələri 2026-cı ilin may ayında işğal olunmuş ərazilərə qarşı ən azı 210 orta mənzilli zərbə endirib. İyun ayında isə bu göstərici 145 olub.
 
Bundan əlavə, Ukrayna Silahlı Qüvvələri 2026-cı ilin aprelində Rusiyanın neft infrastrukturuna qarşı ən azı 18 uzaqmənzilli hücum həyata keçirib. May ayında bu rəqəm 33-ə, iyunda isə 28-ə çatıb ki, bu da Rusiyanın enerji və logistika sistemlərinə qarşı təzyiqin davam etdiyini göstərir.