Avi Loeb naməlum uçan obyektlərin mənşəyini araşdıracaq müstəqil elmi şuraya rəhbərlik edəcək




 
ABŞ prezidenti Donald Trampın administrasiyası Harvard Universitetinin astronomu Avi Loebi ABŞ kəşfiyyatı yanında uçan naməlum anomal obyektlərin (UNO) araşdırılması üzrə yeni yaradılmış müstəqil elmi-məsləhət şurasının rəhbəri təyin edib.
 
Moderator.az xəbər verir ki, bu barədə "vietnam.vn" nəşri məlumat yayıb.
 
Loeb yadplanetlilərlə bağlı cəsarətli nəzəriyyələri səbəbindən həm tanınır, həm də elmi ictimaiyyət tərəfindən tənqid olunur. Yeni şura son illərdə ABŞ hərbçilərinin qeydə aldığı sirli obyektlərin mənşəyini araşdıracaq. 
 
Qurumun işi Milli Kəşfiyyat Direktorunun Ofisi tərəfindən əlaqələndiriləcək və Pentaqondan UNO hadisələri ilə bağlı 50-dən çox məxfi video, foto və sənədin təqdim olunması tələb edilib.
 
Loeb 2017-ci ildə Günəş sistemindən keçən "Oumuamua" obyektinin yadplanetli texnologiyasının izi ola biləcəyini iddia etməklə diqqət çəkib. O, daha sonra Harvardda "Galileo" layihəsini yaradaraq mümkün yadplanetli artefaktlarının axtarışına başlayıb.
 
Astronom bildirib ki, araşdırmalar elmi prinsiplər əsasında aparılacaq və ilkin fərziyyə bütün anomal hadisələrin Yer mənşəli olması olacaq. Buna baxmayaraq, onun təyinatı elmi dairələrdə mübahisələr yaradıb. Tənqidçilər Loebi sensasion iddiaları kifayət qədər sübut olmadan ictimaiyyətə təqdim etməkdə ittiham edirlər.