"Donald Tramp ölkədəki dərin böhranın səbəbi deyil, onun nəticəsidir..."
ABŞ müstəqilliyinin 250 illiyini qeyd etdiyi günlərdə ölkədə prezident səlahiyyətləri ətrafında müzakirələr yenidən alovlanıb.
Moderator.az xəbər verir ki, bu barədə "vot-tak.tv" nəşri yazıb.
ABŞ-da demokratiya və populizm
Ali Məhkəmə prezidentin bəzi müstəqil federal qurumlar üzərində səlahiyyətlərini genişləndirsə də, doğumla vətəndaşlıq hüququnun məhdudlaşdırılması təşəbbüsünü dəstəkləməyib. Den Storevin sözlərinə görə, Tramp ABŞ-də uzun illərdir dərinləşən sosial-iqtisadi böhranın səbəbi yox, nəticəsidir.
Ekspert bildirir ki, qiymətlərin sürətlə artması, gəlirlərin isə geridə qalması amerikalıları dəyişiklik vəd edən populist siyasətçilərə yönəldir. Onun fikrincə, Demokratlar Partiyası isə seçicilərə "biz Tramp deyilik" mesajından başqa cəlbedici proqram təqdim edə bilmir.
Trampın hakimiyyət modeli
Storev hesab edir ki, ABŞ-də getdikcə daha çox insan güclü prezident hakimiyyətini dəstəkləyir. Onun sözlərinə görə, Tramp və komandası prezident səlahiyyətlərinin maksimum genişləndirilməsini nəzərdə tutan "vahid icra hakimiyyəti" nəzəriyyəsini müdafiə edir.
"Bu baxımdan demokratiyanın gələcəyi ilə bağlı narahat olmaq üçün əsaslar var", - deyə ekspert bildirib. O, eyni zamanda Trampı tam təcridçi siyasətçi saymır və hesab edir ki, Tramp xarici münaqişələrdən, o cümlədən İrana qarşı siyasətdən daxili reytinqini artırmaq üçün istifadə etməyə çalışır.
Seçkilər və Ukrayna
Storevin fikrincə, qarşıdakı aralıq seçkilərdə Demokratların qalib gəlmək şansı yüksək olsa da, onların inandırıcı proqramının olmaması böyük üstünlük qazanmasına mane ola bilər. Ekspert hesab edir ki, ABŞ Ukrayna üzrə sülh prosesinə yenidən fəal qoşula bilər.
Bununla belə, onun sözlərinə görə, Tramp üçün Ukrayna heç vaxt əsas xarici siyasət prioriteti olmayıb. Bu yaxınlarda dərc olunan "In Trump's Imperial Presidency" kitabında da Trampın Ukraynaya laqeyd münasibət sərgilədiyi iddia edilir.
