ABŞ prezidenti Donald Tramp administrasiyasının son açıqlamaları Kreml üçün gözlənilməz olub. Vaşinqtonun həm Rusiyanın danışıqlar taktikasını tənqid etməsi, həm də Ukraynanın cəbhədəki uğurlarını etiraf etməsi Moskvanı ritorikasını yenidən nəzərdən keçirməyə məcbur edib.
Moderator.az xəbər verir ki, bu barədə Amerikanın Müharibənin Öyrənilməsi İnstitutunun (ISW) analitikləri bildirib.
Kreml sözçüsü Dmitri Peskov ABŞ-nin Ukraynaya "Patriot" raketlərinin istehsalı üçün lisenziya vermək qərarının əhəmiyyətini kiçiltməyə çalışaraq, Vaşinqtonun əvvəllər də Kiyevə hərbi yardım göstərdiyini bildirib.
O, Trampın son bəyanatlarını eskalasiya deyil, "anlaşılmazlıq" adlandırıb və Vladimir Putinin ABŞ prezidenti ilə dialoqa hazır olduğunu vurğulayıb. Rusiya Xarici İşlər Nazirliyinin sözçüsü Mariya Zaxarova isə ABŞ-ni Avropanın təhlükəsizliyində maraqlı olmamaqda ittiham edən ənənəvi Kremlin mövqeyini təkrarlayıb.
ISW hesab edir ki, Peskov və Zaxarovanın açıqlamaları Kremlin hələ də Tramp administrasiyasının yeni kursuna vahid informasiya cavabı hazırlaya bilmədiyini göstərir. Analitiklər xatırladır ki, ABŞ dövlət katibi Marko Rubio 2025-ci ildə Alyaskada keçirilən ABŞ-Rusiya sammitindən sonra heç bir yazılı razılaşmanın olmadığını təsdiqləyib.
Onların fikrincə, Kreml "Patriot" razılaşmasının və digər son hadisələrin əhəmiyyətini azaltmağa çalışır ki, Vaşinqtonla danışıqlar imkanını qoruyub saxlasın və gələcəkdə Ukrayna və tərəfdaşlarından güzəştlər əldə edə bilsin.
Trampın son açıqlamaları
Donald Tramp bildirib ki, ABŞ Ukraynaya "Patriot" sistemlərinin istehsal texnologiyasını mənimsəməyə kömək edə və bunun üçün lisenziya təqdim edə bilər. O, prosesin mürəkkəb olduğunu desə də, ukraynalıların bunu tez öyrənəcəyinə əminliyini ifadə edib.
ABŞ prezidenti həmçinin Ukraynanın Rusiyanın neft emalı zavodlarına zərbələrini eskalasiya kimi qiymətləndirsə də, bunun müharibənin başa çatmasına töhfə verə biləcəyini söyləyib. Tramp əlavə edib ki, Vladimir Putin müharibənin bitməsini istəyir, lakin onun bu məsələ ilə bağlı şərtləri dəyişib.
