İsrail kəşfiyyatı ABŞ-yə İranın prezident Donald Trampa qarşı yeni sui-qəsd hazırladığına dair məlumat ötürüb. 




 
Moderator.az xəbər verir ki, bu barədə "wsj.com" nəşri yazıb.
 
Məlumata görə, Vaşinqtonda əvvəllər də oxşar xəbərdarlıqlar olsa da, İsrailin təqdim etdiyi kəşfiyyat məlumatları təhlükənin ciddiliyini daha da artırıb.
 
Nəşr qeyd edir ki, İran uzun illərdir İslam İnqilabı Keşikçiləri Korpusunun generalı Qasım Süleymaninin Trampın ilk prezidentliyi dövründə öldürülməsinə görə qisas alacağını bəyan edir. Tramp da NATO sammiti zamanı İranın onu öldürməyə çalışdığını düşündüyünü bildirib.
 
Rəsmi Tel-Əviv və Tehran yayılan məlumatları şərh etməyib. Ağ Ev isə məsələ ilə bağlı Trampın əvvəlki açıqlamalarına istinad edib.
 
Xatırladaq ki, ABŞ Ədliyyə Nazirliyi hələ 2024-cü ildə İranın Trampa qarşı sui-qəsd planı hazırladığını açıqlamış və bu iş üzrə bir neçə nəfərə ittiham irəli sürmüşdü. Bununla yanaşı, son günlər ABŞ ilə İran arasında münasibətlər yenidən kəskinləşib və bu, təhlükəsizlik narahatlıqlarını daha da artırıb.