Yunanıstandan Almaniyaya uçan sərnişin təyyarəsində baş verən texniki nasazlıq faciə ilə nəticələnə bilərdi. Uçuş zamanı pəncərə sındıqdan sonra bir sərnişin qismən təyyarədən çölə sovrulub. Onun həyatını digər sərnişinlər və təhlükəsizlik kəməri xilas edib.
 




Moderator.az xəbər verir ki, bu barədə "vesty.co" nəşri məlumat yayıb
 
Havada dəhşətli hadisə
 
Hadisə "Ryanair" aviaşirkətinə məxsus "Boeing 737-800" təyyarəsində baş verib. Uçuşdan az sonra güclü partlayış səsi eşidilib, pəncərələrdən biri sınıb və qəfil təzyiq itkisi yaranıb.
Pəncərə kənarında əyləşən 61 yaşlı sərnişinin başı və çiyinləri təyyarədən çölə çıxıb. Təhlükəsizlik kəməri onu tamamilə bayıra sovrulmaqdan qoruyub.
 
Sərnişinlər onu xilas etdilər
 
Zərərçəkənin həyat yoldaşı və yaxınlıqda əyləşən sərnişinlər onu ayaqlarından və paltarından tutaraq bir neçə dəqiqə ərzində içəridə saxlaya biliblər. Bu vaxt oksigen maskaları avtomatik açılıb, pilotlar isə təyyarəni təcili şəkildə Salonikiyə geri qaytarıblar. Hadisə nəticəsində kişi boyun nahiyəsindən və bədəninin müxtəlif yerlərindən xəsarətlər alıb. Təyyarədə olan hamilə qadın da müayinə üçün xəstəxanaya aparılıb.
 
Səbəb araşdırılır
 
İlkin ehtimallara görə, mühərrikdən qopan metal hissə pəncərəni sındırıb, lakin bu versiya hələ rəsmi təsdiqini tapmayıb. Aviaşirkət sərnişinləri ehtiyat təyyarə ilə Almaniyaya göndərib, hadisənin səbəbləri isə araşdırılır. Mütəxəssislər bu hadisədən sonra bir daha vurğulayıblar ki, uçuş boyu təhlükəsizlik kəmərinin bağlı saxlanılması həyati əhəmiyyət daşıyır.