İsrail alimləri ən aqressiv və ölümcül beyin şişi hesab edilən qlioblastomanın müalicəsində mühüm nəticə əldə ediblər. 




 
Moderator.az xəbər verir ki, bu barədə "news.ru.co" nəşri yazıb.
 
Nəşr yazır ki, tədqiqatçılar şişin kimyaterapiyaya qarşı qazandığı davamlılığı aradan qaldırmağa kömək edə biləcək yeni yanaşma hazırlayıb. Araşdırma Qüdsdəki İvrit Universitetinin alimləri tərəfindən aparılıb və nəticələri "Cancer Medicine" elmi jurnalında dərc olunub.
 
Müalicənin əsas maneəsi aradan qaldırıla bilər
 
Hazırda qlioblastomanın standart müalicəsinə cərrahi əməliyyat, şüa terapiyası və temozolomid preparatı daxildir. Lakin əksər hallarda şiş ya bu preparata zəif reaksiya verir, ya da qısa müddətdə ona qarşı davamlılıq formalaşdırır ki, bu da müalicə imkanlarını ciddi şəkildə məhdudlaşdırır. Alimlər bu dəfə birbaşa şişi deyil, onun sağ qalmasına kömək edən mexanizmi hədəfə alıblar. Onlar sinir toxumalarında azot oksidinin həddindən artıq yaranmasına səbəb olan prosesi BA-101 adlı eksperimental maddə ilə bloklayıblar.
 
Nəticələr ümidvericidir
 
Laboratoriya sınaqları göstərib ki, BA-101 şiş hüceyrələrinin böyüməsini ləngidir, onların ətraf toxumalara yayılmasını azaldır və xərçəng hüceyrələrinin məhvinə səbəb olur. Ən mühüm nəticə isə BA-101 temozolomidlə birlikdə istifadə edildikdə əldə olunub. Bu zaman əvvəllər kimyaterapiyaya davamlı olan şişlər yenidən müalicəyə cavab verməyə başlayıb. Siçanlar üzərində aparılan təcrübələrdə bu kombinasiyanın şişin inkişafını hər iki preparatın ayrıca istifadəsi ilə müqayisədə daha effektiv şəkildə ləngitdiyi müşahidə olunub.
 
Hələlik eksperimental mərhələdədir
 
Tədqiqatın rəhbəri, professor Haytam Amal bildirib ki, əldə olunan nəticələr qlioblastomanın daha effektiv müalicəsi üçün yeni perspektiv açır. Bununla belə, BA-101 hələ eksperimental preparat hesab olunur və insanların müalicəsində istifadə olunmazdan əvvəl əlavə laborator və klinik sınaqlardan keçməlidir.
Alimlərin fikrincə, bu yanaşma gələcəkdə mövcud dərmanları əvəz etmədən, onların effektivliyini yenidən bərpa edən kombinə olunmuş müalicə üsullarının əsasını təşkil edə bilər.