Ukrayna işğal altındakı Krımı təcrid etmək əməliyyatının üçüncü mərhələsinə keçərək Azov və Qara dənizdə Rusiya gəmilərinə intensiv zərbələr endirməyə başlayıb.
Moderator.az xəbər verir ki, bu barədə "nyt.com" nəşri yazıb.
Dəniz marşrutları əsas hədəfə çevrilib
Nəşr yazır ki, Kiyevin məqsədi yarımadaya yanacaq və hərbi yüklərin çatdırılmasını çətinləşdirmək, Rusiyanın logistika zəncirini pozmaqdır. Nəşrin məlumatına görə, Ukrayna əvvəllər Krıma gedən avtomobil yollarını, dəmir yolunu, yanacaq bazalarını və enerji infrastrukturunu vururdu. İndi isə əsas diqqət dəniz təchizat marşrutlarına yönəldilib.
Bu məqsədlə uzaqmənzilli pilotsuz uçuş aparatlarından istifadə olunur və onların sayəsində artıq Azov dənizində də əməliyyatlar həyata keçirilir. Ukrayna Baş Qərargahı bildirir ki, son günlər tankerlər, yük gəmiləri və yardımçı katerlər də daxil olmaqla onlarla Rusiya gəmisinə zərbələr endirilib. Nəşr ən azı 11 gəminin hücuma məruz qaldığını təsdiqləyir və real rəqəmin daha yüksək ola biləcəyini istisna etmir.
Krımın təcridinin üçüncü mərhələsi
Ukraynanın 414-cü Pilotsuz Sistemlər Briqadasının nümayəndəsinin sözlərinə görə, Krımı təcrid etmək planı üç mərhələdən ibarətdir. Birinci mərhələdə quru nəqliyyat marşrutları, ikinci mərhələdə yanacaq ehtiyatları və iri logistika obyektləri hədəfə alınıb. Keçən həftədən isə dəniz marşrutlarına qarşı əməliyyatlara başlanılıb.
Bildirilib ki, pilotsuz aparatların operatorları təxminən 400 kilometr məsafə qət edərək Rusiya hava hücumundan müdafiə və radioelektron mübarizə sistemlərini aşmalı olurlar. Dronlar aşkarlanmamaq üçün dəniz üzərində çox alçaq hündürlükdə uçur.
Rusiya dəniz daşımalarına daha çox güvənir
Nəşr yazır ki, Ukraynanın neft bazalarına və nəqliyyat infrastrukturuna endirdiyi zərbələrdən sonra Rusiya Krımın təminatında dəniz marşrutlarından daha fəal istifadə etməyə başlayıb. Atlantik Şurasının eksperti Elizabet Brou hesab edir ki, Azov dənizində hərəkət edən gəmilərin əksəriyyəti ixrac üçün deyil, məhz işğal olunmuş Krımın təminatı üçün yük daşıyırdı.
Moskva isə bu hücumların planlarını dəyişməyəcəyini bildirir. Rusiya xarici işlər naziri Sergey Lavrov Ukraynanın gəmilərə zərbələrini "piratçılıqdan da pis" adlandırıb. Bununla yanaşı, Rusiyanın hərbi bloqerləri Krımla dəniz əlaqəsini qoruya bilmədiyinə görə ölkənin hərbi rəhbərliyini kəskin tənqid edirlər.
