Ukraynanın orta mənzilli pilotsuz uçuş aparatları cəbhədə vəziyyətə getdikcə daha çox təsir göstərir. 




 
Moderator.az xəbər verir ki, bu barədə "Foreign Policy" nəşri yazıb.
 
Dronlar Rusiyanın logistikasını zəiflədir
 
Nəşr  yazır ki, bu dronlar Rusiya ordusunun təchizat marşrutlarına zərbələr endirərək sursat, yanacaq və ərzaq daşınmasını çətinləşdirir. Kiyev belə PUA-ların istehsalını ildə 100 min ədədə çatdırmağı və onları daha çox hərbi hissədə tətbiq etməyi planlaşdırır. Böyük Britaniyanın RUSI analitik mərkəzinin eksperti Nik Reynoldsun fikrincə, orta mənzilli dronlar bir çox hallarda HIMARS kimi uzaqmənzilli silah sistemlərinin yaratdığı boşluğu doldurmağa başlayıb.
 
Təkcə dronlar kifayət etməyə bilər
 
Ekspertlər hesab edir ki, logistikanın zəiflədilməsi Rusiyaya ciddi zərbə vursa da, bu, işğal olunmuş ərazilərin geri qaytarılması üçün kifayət etməyə bilər. "Sağ qayıt" fondunun analitiki Nikolay Beleskovun sözlərinə görə, hazırda əsas məqsəd cəbhədə vəziyyətin daha da pisləşməsinin qarşısını almaqdır. O vurğulayıb ki, genişmiqyaslı əks-hücum üçün Ukraynanın kifayət qədər hazırlıqlı hücum bölmələri yoxdur.
 
Müharibənin gedişinə təsir artır

Analitiklər qeyd edir ki, uzaqmənzilli Ukrayna dronları artıq Rusiyanın enerji infrastrukturu və işğal olunmuş Krımdakı logistika obyektlərinə də müntəzəm zərbələr endirir. Bu isə Moskvanı hava hücumundan müdafiə sistemlərinin bir hissəsini cəbhədən geri çəkərək ölkə daxilində yerləşdirməyə məcbur edir.
 
"Foreign Policy" vurğulayır ki, Ukraynanın dron sahəsində əldə etdiyi uğurlar yalnız hərbi deyil, həm də siyasi əhəmiyyət daşıyır. Nəşrin fikrincə, bu nəticələr Qərb ölkələrinin Kiyevə silah və hava hücumundan müdafiə vasitələri ilə dəstəyini davam etdirməsində mühüm rol oynayır.