Argentina millisi İngiltərəni 2:1 hesabı ilə məğlub edərək ardıcıl ikinci dəfə dünya çempionatının finalına yüksəlib.




 
Moderator.az xəbər verir ki, bu barədə "sport.business-gazeta.ru" nəşri yazıb.
 
Nəşr yazır ki, komanda son beş ildə Amerika Kubokunu iki dəfə qazanıb, 2022-ci ilin dünya çempionu olub və indi daha bir tarixi uğurun astanasındadır. Bəs Argentinanın bu yüksəlişinin sirri nədir?
 
Risk edilən məşqçi tarixi uğura çevrildi

2018-ci ildə Lionel Skaloni Argentina millisinin baş məşqçisi təyin olunanda bu qərarı çoxları müvəqqəti addım hesab edirdi. Gənc mütəxəssisin ciddi məşqçilik təcrübəsi yox idi və ilk müqaviləsi cəmi altı yoldaşlıq oyunu üçün nəzərdə tutulmuşdu.

Lakin federasiya ona etimad göstərdi və nəticə özünü çox gözlətmədi. Argentina 2021-ci ildə Amerika Kubokunu qazandı, daha sonra dünya çempionu oldu və indi yenidən finaldadır. Skaloni həm də sakit xarakteri və futbolçularla münasibəti ilə seçilir. O, qələbələri heç vaxt öz adına çıxmır, uğuru həmişə komandaya və Lionel Messiyə aid edir.
 
Bütün komanda Messinin ətrafında birləşdi

Hazırkı Argentina millisində Lionel Messi təkcə kapitan deyil, həm də komandanın əsas ideyasına çevrilib. Gənc futbolçular onu uşaqlıq qəhrəmanı hesab edir və son dünya çempionatında onun üçün kuboku qazanmağı özlərinə məqsəd qoyublar. Bir neçə il əvvəl tənqidlərdən bezən Messi hətta millidən getdiyini açıqlamışdı. İndi isə vəziyyət tamamilə dəyişib. Baş məşqçi ilk gündən ona tam etimad göstərib, futbolçular isə Messinin son mundialını qələbə ilə başa vurmaq üçün əlindən gələni edir.

Messi yalnız yaradıcılığa fokuslanıb
 
Skaloni taktikanı da Messiyə uyğun qurub. Komandanın digər futbolçuları müdafiədə və presinqdə daha çox işləyir, Messi isə enerjisini hücum və həlledici epizodlara saxlayır. Bu yanaşma öz nəticəsini verir. Messi turnirə əla fiziki formada gəlib, məhsuldar oyunu ilə komandasını finala daşıyıb. İngiltərə ilə yarımfinalda özü qol vurmasa da, hər iki qolun məhsuldar ötürməsini edib.
 
Messinin uğurunun arxasında ciddi hazırlıq dayanır

Argentinalı ulduzun yüksək səviyyəli oyunu təsadüfi deyil. 39 yaşlı Messi dünya çempionatına hazırlıq dövründə məşq və qidalanma rejimini daha da təkmilləşdirib. O, əzələ kütləsini qorumaq üçün güc məşqlərinə, bədənin mərkəz hissəsini gücləndirən hərəkətlərə və qısa məsafəli sprintlərə xüsusi diqqət ayırır.

Bununla yanaşı, Messi təzə tərəvəz, meyvə, balıq və yağsız ətə üstünlük verir, emal olunmuş qidalar və şəkərdən mümkün qədər uzaq durur. Mütəxəssislər bildirirlər ki, düzgün qidalanma, keyfiyyətli yuxu və bərpa prosesi onun 39 yaşında da ən yüksək səviyyədə çıxış etməsinin əsas səbəblərindəndir.
 
İndi qarşıda son sınaq var

Argentina hələ də ideal komanda sayılmır. Pley-off mərhələsində Misir, İsveçrə və Kabo-Verde ilə oyunlarda ciddi çətinliklər yaşayıb və xeyli qol buraxıb. Buna baxmayaraq, komanda ardıcıl ikinci dəfə dünya çempionatının finalına yüksəlməklə tarix yazıb. Əgər Argentina finalda İspaniyanı məğlub etsə, dünya çempionu titulunu qorumağı bacaran azsaylı komandalar sırasına qoşulacaq.