Dəriyə düzgün qulluq və sağlam axşam vərdişləri qocalma prosesini ləngidə, həm görünüşü, həm də ümumi sağlamlığı uzun illər qorumağa kömək edə bilər
40 yaşdan sonra orqanizmdə baş verən təbii dəyişikliklər dərinin elastikliyinin azalmasına, yuxu keyfiyyətinin pisləşməsinə və maddələr mübadiləsinin zəifləməsinə səbəb olur.
Moderator.az xəbər verir ki, bu barədə "independent.com" nəşri yazıb.
Mütəxəssislər bildirir ki, bu dəyişikliklərin qarşısını tam almaq mümkün olmasa da, gündəlik həyatda formalaşdırılan düzgün vərdişlər onların təsirini əhəmiyyətli dərəcədə azalda bilər.
Dəriyə qulluq yaş artdıqca daha da vacib olur
Mütəxəssislər bildirir ki, dərinin vəziyyəti təkcə genetikadan deyil, həm də həyat tərzi və ətraf mühit amillərindən asılıdır. Xüsusilə 40 yaşdan sonra dəri daha quru və həssas olduğundan ona qulluq qaydalarını yenidən nəzərdən keçirmək lazımdır.
Bu dövrdə sərt təmizləyici vasitələr və tez-tez skrabdan istifadə əvəzinə krem və ya yağ əsaslı təmizləyicilər seçmək tövsiyə olunur. Bundan əlavə, dərinin ehtiyacına uyğun serumlardan istifadə etmək, yaşa uyğun nəmləndirici kremlər çəkmək və hər gün günəşdən qoruyucu vasitələrdən istifadə etmək vacib sayılır.
Mütəxəssislərin fikrincə, retinol tərkibli məhsullar qırışların, piqment ləkələrinin və elastiklik itkisini azaltmağa kömək edə bilər. Lakin retinoldan istifadəyə həftədə 1-2 dəfə başlayıb, sonradan tədricən artırmaq məsləhətdir.
Sağlam axşam vərdişləri yuxunu yaxşılaşdırır
Yaş artdıqca, xüsusilə qadınlarda hormonal dəyişikliklər səbəbindən yuxu problemləri daha çox müşahidə olunur. Dietoloqlar bildirir ki, sadə axşam vərdişləri yuxunun keyfiyyətini əhəmiyyətli dərəcədə yaxşılaşdıra bilər. Mütəxəssislər axşam yeməyi erkən yeyilibsə, yatmazdan əvvəl yüngül zülallı qəlyanaltı etməyi məsləhət görürlər.
Təbii yunan yoqurtu, kəsmik, bir ovuc qoz-fındıq və ya qaynadılmış yumurta yaxşı seçim hesab edilir. Gün ərzində kifayət qədər su qəbul etmək vacibdir, lakin yatmazdan əvvəl maye qəbulunu azaltmaq gecə tez-tez oyanma riskini azaldır.
Telefonu kənara qoyun, alkoqoldan uzaq durun
Mütəxəssislər qeyd edir ki, yatmazdan əvvəl bir neçə dəqiqə nəfəs məşqləri etmək, elektron cihazlardan uzaqlaşmaq, otaqda işığı azaltmaq, kitab oxumaq və hər gün eyni saatda yatmaq orqanizmin bioloji ritmini tənzimləyir və daha rahat yuxuya getməyə kömək edir. Həkimlər axşam saatlarında spirtli içkilərdən istifadə etməməyi də tövsiyə edir.
Onların sözlərinə görə, alkoqol ilk baxışdan rahatlaşdırıcı təsir göstərsə də, yuxunun dərin fazasını pozur, gecə tez-tez oyanmağa səbəb olur və orqanizmin bərpa prosesini zəiflədir. Mütəxəssislər hesab edir ki, düzgün dəriyə qulluq və sağlam axşam vərdişləri birlikdə tətbiq olunduqda uzun müddət gənc və sağlam qalmağa kömək edə bilər.
