ABŞ və İran arasında qarşılıqlı hərbi əməliyyatlar artıq yeddinci gecədir davam edir. Vaşinqton İran ərazisində yeni hədəfləri vurduğunu açıqlayarkən, Tehran ABŞ-ın regiondakı hərbi obyektlərinə cavab zərbələri endirdiyini bildirir. Artan gərginlik fonunda Küveyt hava məkanını müvəqqəti bağlayıb.
Moderator.az xəbər verir ki, bu barədə "euronews.com" nəşri məlumat yayıb.
ABŞ və İran qarşılıqlı zərbələri davam etdirir
ABŞ Mərkəzi Komandanlığı (CENTCOM) İranın müşahidə məntəqələri, hərbi logistika infrastrukturu, yeraltı silah anbarları və dəniz obyektlərinə zərbələr endirildiyini açıqlayıb. Əməliyyatlarda qırıcı təyyarələr, pilotsuz uçuş aparatları və döyüş gəmilərinin iştirak etdiyi bildirilib.
Buna cavab olaraq İrana yaxın mənbələr ABŞ-ın Küveyt, Bəhreyn və digər Fars körfəzi ölkələrində yerləşən hərbi bazalarının hədəfə alındığını iddia edib. Küveyt və İordaniya isə hava hücumundan müdafiə sistemlərinin İran raket və dronlarını zərərsizləşdirdiyini açıqlayıb.
Hörmüz boğazında gərginlik davam edir
Məlumatlara görə, Hörmüz boğazında gəmiçilik hələ də məhdudlaşdırılıb. Bu marşrut dünya neft və qaz daşımalarının əsas yollarından biri hesab olunur. Daha əvvəl tərəflər boğazın yenidən açılması barədə müvəqqəti razılığa gəlsələr də, döyüşlərin yenidən alovlanması danışıqları dalana dirəyib.
İran tərəfi həmçinin Hörmüz boğazından keçməyə çalışan bir neçə ticarət gəmisini saxladığını iddia edib. ABŞ isə İsrail istiqamətinə əlavə hərbi təyyarələr göndərərək İrana qarşı əməliyyatları genişləndirməyə hazırlaşdığı barədə məlumatları təkzib etməyib.
ABŞ vətəndaşlarına xəbərdarlıq edib
ABŞ Dövlət Departamenti İsraildə və Yaxın Şərqin digər ölkələrində olan, eləcə də regiona səfər etməyi planlaşdıran ABŞ vətəndaşlarına təhlükəsizlik xəbərdarlığı yayıb. Rəsmi Vaşinqton bölgədə vəziyyətin gözlənilmədən daha da pisləşə biləcəyini bildirərək, zəruri olmayan səfərlərin yenidən nəzərdən keçirilməsini tövsiyə edib.
Amerika vətəndaşlarına diqqətli olmaq, xəbərləri izləmək və uçuşlarının vəziyyətini əvvəlcədən aviaşirkətlərlə dəqiqləşdirmək tövsiyə olunub. Diplomatik nümayəndəliklərin isə fövqəladə rejimdə fəaliyyətini davam etdirdiyi bildirilir.
