Ukrayna prezidenti Vladimir Zelenski cəbhənin ən çətin istiqamətlərinə cavabdeh olan korpus komandirləri ilə geniş müşavirə keçirib.
Moderator.az xəbər verir ki, bu barədə "ua.news" nəşri məlumat yayıb.
Cəbhədəki vəziyyət və yeni silah tədarükü
Məlumatda deyilir ki, görüşdə döyüş əməliyyatlarının gedişi, silah təminatı və Rusiyanın logistikasına endirilən zərbələrin nəticələri müzakirə olunub. Zelenskinin sözlərinə görə, görüşdə Slavyansk, Pokrovsk, Aleksandrovsk istiqamətləri və Xarkov vilayətindəki vəziyyət nəzərdən keçirilib.
Tərəflər hərbi hissələrin rotasiyası, Ukrayna logistikasının qorunması və Rusiya təchizat xətlərinə zərbələrin davam etdirilməsi məsələlərini də müzakirə edib. Prezident vurğulayıb ki, ordunun daha çox uzaqmənzilli artilleriyaya, 155 millimetrlik mərmilərə və orta mənzilli zərbə vasitələrinə ehtiyacı var. Onun sözlərinə görə, bu istiqamətdə silah istehsalçıları və tərəfdaşlarla əlavə tədarük imkanları müzakirə olunacaq.
Rusiyanın logistika obyektlərinə zərbələr
Zelenski bildirib ki, Ukraynanın uzaqmənzilli pilotsuz aparatları və raketləri Rusiya ərazisində, eləcə də işğal altındakı Krım və dəniz akvatoriyalarında bir sıra hədəfləri vurub. Onun sözlərinə görə, Moskva və Tambov vilayətlərində məhv edilən iri logistika mərkəzləri pilotsuz aparatların istehsalı üçün sanksiyalara məruz qalan komponentlərin daşınmasında istifadə olunurdu.
Prezident əlavə edib ki, neft infrastrukturu obyekti də vurulub, orta mənzilli raketlərlə isə Azov dənizi, Qara dəniz və işğal altındakı Krımdakı hədəflərə zərbələr endirilib. Zelenski bu əməliyyatları Rusiyanın Ukraynanın mülki infrastrukturuna hücumlarına cavab adlandırıb.
