ABŞ Federal Təhqiqat Bürosunun (FTB) direktoru Keş Patel bu ilin payızında, böyük ehtimalla oktyabrın 14-15-də Rusiyaya səfər etməyi planlaşdırır.
Moderator.az xəbər verir ki, bu barədə "Politico" nəşri yazıb.
ABŞ-Rusiya münasibətlərində diqqətçəkən səfər
Nəşr qeyd edir ki, FTB rəhbərinin Rusiyaya səfəri ABŞ ilə Rusiya arasında Ukrayna müharibəsi səbəbindən gərginliyin davam etdiyi, Vaşinqtonda isə Moskvaya qarşı yeni sərt sanksiyaların müzakirə olunduğu bir vaxta təsadüf edir. Məlumata görə, Patel əvvəlcə Moskvaya, daha sonra isə Sankt-Peterburqa gedəcək. Qəbul edən tərəfin Rusiyanın Federal Təhlükəsizlik Xidməti (FTX) olacağı ehtimal edilir.
"Raşaqeyt" işi ilə tanınır
Nəşr yazır ki, Keş Patel Donald Trampın ilk prezidentliyi dövründə "Raşaqeyt" adlandırılan, 2016-cı il prezident seçkilərində Trampın Rusiya ilə mümkün əlaqələrinə dair aparılan araşdırmanı açıq şəkildə tənqid etməsi ilə tanınıb. Hazırda isə o, FTB rəhbəri kimi həyata keçirdiyi səs-küylü xarici səfərlərlə Konqresin diqqət mərkəzindədir.
Görüşlərin gündəliyi açıqlanmayıb
Nəşr yazır ki, hələlik Patelin Vladimir Putin və ya Kremlin yüksək vəzifəli nümayəndələri ilə görüşüb-görüşməyəcəyi məlum deyil. Danışıqların gündəliyi də açıqlanmayıb və səfər planının dəyişə biləcəyi bildirilir. Nəşr vurğulayır ki, səfər planı ilkin xarakter daşıyır və dəyişə bilər.
Məqalədə xatırladılır ki, Rusiyaya sonuncu dəfə 2013-cü ildə FTB-nin o zamankı direktoru Robert Müller səfər edib. Daha sonra o, Trampın seçki kampaniyası ilə Rusiya arasındakı mümkün əlaqələri araşdıran xüsusi prokuror təyin olunmuşdu. ABŞ kəşfiyyatı isə uzun illərdir Moskvanın ABŞ seçkilərinə müdaxilə etməyə və ölkədə fikir ayrılığı yaratmağa çalışdığı qənaətindədir.
