Avropa İttifaqı (Aİ) Rusiyanın Ukraynaya qarşı müharibəsinə görə tətbiq etdiyi sanksiyaları daha da sərtləşdirir. Bir neçə həftə davam edən danışıqlardan sonra Aİ ölkələri Rusiyaya qarşı 21-ci sanksiyalar paketi üzrə siyasi razılıq əldə edib. Sənədin yaxın saatlarda Aİ Şurası tərəfindən rəsmən təsdiqlənəcəyi gözlənilir.




 
Moderator.az xəbər verir ki, bu barədə "bbc.com" nəşri məlumat yayıb.
 
Enerji və maliyyə sektoruna yeni zərbələr
 
Məlumatda deyilir ki, yeni paket enerji, maliyyə, kriptovalyuta sektoru və Rusiyanın "kölgə donanması"na qarşı əlavə məhdudiyyətləri nəzərdə tutur. Paketin əsas müddəalarından biri Rusiya nefti üçün tətbiq olunan qiymət tavanının daha 12 ay qüvvədə saxlanılmasıdır.
 
Bundan başqa, Rusiyanın maliyyə sektoru, kriptovalyuta əməliyyatları, "kölgə donanması"na aid gəmilər və onların fəaliyyətinə dəstək verən şəxslərə qarşı yeni məhdudiyyətlər tətbiq olunacaq. Həmçinin Rusiyanın hərbi-sənaye kompleksinin texnologiyalara çıxışını daha da məhdudlaşdıran ticarət tədbirləri nəzərdə tutulur.
 
Viza məhdudiyyətləri də gündəmdədir
 
Razılaşmaya əsasən, 24 fevral 2022-ci ildən əvvəl bağlanmış müqavilələr üzrə Rusiya mayeləşdirilmiş təbii qazının üçüncü ölkələrə daşınmasına məhdud istisna tətbiq ediləcək. Lakin bu əməliyyatların genişləndirilməsinə icazə verilməyəcək və istisna hər il yenidən nəzərdən keçiriləcək.
 
Paketə həmçinin Ukraynaya qarşı müharibədə iştirak etmiş keçmiş Rusiya hərbçilərinə Aİ vizalarının verilməsinin məhdudlaşdırılması üçün hazırlıq tədbirləri də daxildir.
 
Avropa İttifaqı Şurasının prezidenti Antonio Koşta bildirib ki, yeni sanksiyalar Rusiyaya təzyiqi daha da artırmağa hesablanıb və Aİ Ukraynaya dəstəyini davam etdirəcək.