İyulun 24-ə işğalçı Rusiyanın Kiyevə ballistik raketlərlə zərbə endirdi. Ukrayna Silahlı Qüvvələri isə Sankt-Peterburq, Leninqrad vilayəti, Kirov və işğal olunmuş Krımdakı obyektlərə zərbələrlə cavab verib.




 
Moderator.az xəbər verir ki, bu barədə "oboz.ua" nəşri məlumat yayıb.
 
Rusiya Kiyevə ballistik raketlərlə hücum etdi

24 iyul səhəri Rusiya Kiyevə ballistik raketlərlə hücum edib. Paytaxtda partlayışlar baş verib, hava hücumundan müdafiə sistemləri fəaliyyətə başlayıb. Ukrayna Hərbi Hava Qüvvələri raketlərin şimal istiqamətindən gəldiyini bildirib. Monitorinq məlumatlarına görə, Kiyevə təxminən 10 ballistik raket, o cümlədən ehtimal olunan "Sirkon" raketləri atılıb.
 
Kiyev meri Vitali Kliçko sakinləri sığınacaqlarda qalmağa çağırıb. Daha sonra o, Svyatoşin rayonuna tibbi yardım briqadalarının çağırıldığını açıqlayıb. Son aylarda Rusiya Kiyev və digər Ukrayna şəhərlərinə hücumlarda ballistik raketlərdən, PUA-lardan və qanadlı raketlərdən geniş istifadə edir.
 
Ukrayna Rusiyanın logistika obyektlərinə zərbə endirdi
 
Eyni vaxtda Ukrayna qüvvələri Rusiyanın bir neçə bölgəsində obyektlərə hücum edib. Sankt-Peterburq və Leninqrad vilayətində "Wildberries" şirkətinin iki böyük logistika mərkəzi vurulub. Şuşarı və Utkin Zavod ərazisindəki anbarlarda yanğın baş verib.

Şirkət hər iki kompleksin fəaliyyətinin dayandırıldığını və əməkdaşların təxliyə edildiyini bildirib. Hücum səbəbindən Pulkovo hava limanında təxminən 50 reys gecikib. İşğal olunmuş Krımın Simferopol şəhərində yerləşən "Wildberries" logistika mərkəzi də hücuma məruz qalıb.
 
Kirovdakı hərbi zavod hədəfə alındı
 
Ukraynanın digər hədəfi Kirov şəhərində yerləşən "AVİTEK" Vıyatka maşınqayırma müəssisəsi olub. Zavod Ukrayna sərhədindən 1000 kilometrdən çox məsafədə yerləşir.

Müəssisə Rusiya ordusu üçün hava hücumundan müdafiə sistemləri, "Tor" zenit-raket kompleksləri üçün komponentlər və digər hərbi məhsullar istehsal edir.
 
"Fire Point" şirkəti zavodun FP-5 "Flamingo" raketi ilə vurulduğunu təsdiqləyib. Ukrayna prezidenti Vladimir Zelenski bildirib ki, zərbə Rusiya ordusunun raket və aviasiya texnikası istehsalında iştirak edən mühüm müəssisəyə endirilib. Ukrayna son dövrdə Rusiyanın dərinliklərində yerləşən hərbi-sənaye və logistika obyektlərinə hücumları artırıb. Məqsəd Rusiya ordusunun silah istehsalı və təchizat imkanlarını zəiflətməkdir.