ABŞ İranla tükəndirmə müharibəsinə sürüklənib, Rusiya isə Tehrana dəstək verərək Vaşinqton üçün Yaxın Şərqdə yeni problemlər yaradır.




 
Moderator.az xəbər verir ki, bu barədə Çinin "NetEase" nəşri yazıb.
 
ABŞ müharibənin yükü altında
 
Nəşrin fikrincə, ABŞ İranla uzunmüddətli qarşıdurmaya hazır deyildi və indi həm maliyyə, həm də hərbi resurs baxımından çətin vəziyyətlə üzləşib. ABŞ Mərkəzi Komandanlığı iyulun 23-də İrana qarşı zərbələrin 12-ci mərhələsinin başa çatdığını açıqlayıb. Müdafiə naziri Pit Heqset isə müharibənin ABŞ-a indiyədək təxminən 37,5 milyard dollara başa gəldiyini bildirib.
 
Məqalədə qeyd olunur ki, Vaşinqton İraq və Əfqanıstanda olduğu kimi, İranda da sürətli qələbə gözləyib, lakin uzunmüddətli qarşıdurmaya sürüklənib. Münaqişədə 18 amerikalı hərbçinin öldüyü, təxminən 100 hərbçinin yaralandığı bildirilir.
 
Harvard Universitetinin professoru Linda Bilmsin hesablamalarına görə, İran münaqişəsinin növbəti 10 ildə ABŞ vergi ödəyicilərinə ümumi dəyəri 1 trilyon dollara çata bilər. ABŞ daxilində müharibəyə qarşı narazılıq da artır. "Washington Post"/Ipsos sorğusuna görə, amerikalıların 68 faizi İranla müharibənin buna dəymədiyi qənaətindədir.
 
Rusiya amili
 
Məqalədə deyilir ki, ABŞ-ın digər problemi silah ehtiyatlarının azalmasıdır. Strateji və Beynəlxalq Araşdırmalar Mərkəzinin məlumatına görə, "Tomahawk" raketləri və "Patriot" sistemləri üzrə ehtiyatların bərpası üçün ABŞ istehsalçılarına ən azı üç il lazım olacaq. Müəllif hesab edir ki, Vaşinqton yenidən rəqibini düzgün qiymətləndirməyib.
 
İranın böyük raket və PUA ehtiyatları var, bundan əlavə, Tehran Rusiyanın dəstəyinə malikdir. Moskva və Tehran hərbi əməkdaşlığı genişləndirib. Rusiya İrana PUA texnologiyaları və kəşfiyyat məlumatları ilə dəstək verir. Sergey Lavrov isə İrana birbaşa silah tədarükü barədə məlumatları təkzib edib.
 
Müharibədən çıxış yolu çətinləşir
 
Müəllifin fikrincə, ABŞ İranda sürətli qələbə gözləyirdi, lakin Rusiyanın Tehrana dəstəyi bu planı çətinləşdirib. Vaşinqton indi ya müharibəni davam etdirməli, ya da geri çəkilərək siyasi zərbə ilə üzləşməlidir. Münaqişə artıq Yaxın Şərqin digər bölgələrinə də yayılır. 
 
İranın İordaniya və Küveytdəki obyektlərə zərbələr endirdiyi, Yəmən husilərinin isə Səudiyyə Ərəbistanına qarşı dəniz blokadası elan etdiyi bildirilir. İran zəif deyil, Rusiyanın və regiondakı müttəfiq qüvvələrin dəstəyinə malikdir. ABŞ-da narazılıq artır, resurslar azalır, Vaşinqton isə müharibədən çıxış strategiyası tapa bilmir. "Başqasına quyu qazan özü düşər".