Kiyev vilayətindəki faciə araşdırılır
Ukrayna prezidenti Vladimir Zelenski ölkənin və xarici kəşfiyyat xidmətlərinin məlumatına əsasən, Rusiyanın yaxın 48 saat ərzində Ukraynaya növbəti kütləvi raket zərbəsi endirə biləcəyini bildirib. O, vətəndaşları hava həyəcanı siqnallarına ciddi yanaşmağa çağırıb.
Moderator.az xəbər verir ki, bu barədə "gordonua.com" nəşri yazıb.
Yeni hücum təhlükəsi
Prezident vurğulayıb ki, Ukrayna üçün əsas prioritet hava hücumundan müdafiənin gücləndirilməsidir və tərəfdaşlar bu istiqamətdə razılaşdırılmış yardımı gecikdirmədən həyata keçirməlidirlər.
Kiyev vilayətində faciə
İyulun 24-də Rusiya Kiyev vilayətinə ballistik raketlərlə zərbə endirib. Hücum zamanı müdafiə sənayesi nümayəndələrinin iştirak etdiyi silah sərgisi keçirilirdi. Son məlumata görə, 10 nəfər həlak olub, 100-ə yaxın insan yaralanıb. Zelenski bildirib ki, müharibə şəraitində yaşayış məntəqələrinin yaxınlığında və çoxsaylı insanların iştirakı ilə belə tədbirlərin keçirilməsi yolverilməzdir.
Hadisə ilə bağlı həm Rusiya hücumunun hərbi cinayət kimi, həm də tədbirin təşkilində mümkün səhlənkarlıq faktı üzrə araşdırma aparılır. Faciə ilə əlaqədar iyulun 25-i Kiyev vilayətində matəm günü elan edilib.
Səfərbərlik və Trampla görüş
Zelenskinin sözlərinə görə, Ukrayna kəşfiyyatı Rusiyanın payız aylarında yeni genişmiqyaslı səfərbərliyə hazırlaşdığı qənaətindədir. O bildirib ki, Kreml cəbhədəki itkiləri kompensasiya etmək və hücumları genişləndirmək üçün əlavə canlı qüvvə toplamağı planlaşdırır.
Prezident həmçinin ABŞ prezidenti Donald Trampla və onun komandası ilə görüşə hazırlaşdıqlarını açıqlayıb. Zelenski Vaşinqtonun Ukraynaya dəstəyinin davam edəcəyinə və bunun ədalətli sülhə nail olunmasına kömək edəcəyinə ümid etdiyini vurğulayıb.
