Ukrayna son vaxtlar Rusiyanın ən böyük onlayn ticarət platformalarından biri olan "Wildberries"-in logistika mərkəzlərinə zərbələri artırıb.
Moderator.az xəbər verir ki, bu barədə Britaniyanın "The Sun" nəşri yazıb.
Nəşr yazır ki, bu taktika yalnız iqtisadi zərər vurmaqla kifayətlənmir, həm də Kremlə ictimai və siyasi təzyiqi gücləndirə bilər.
Kiçik biznes və gündəlik ticarət zərbə altında
Məqalədə bildirilir ki, Ukrayna dronları son günlər Rusiyanın müxtəlif bölgələrində "Wildberries"-in bir neçə logistika kompleksini sıradan çıxarıb. Nəşrin fikrincə, bunun nəticəsində minlərlə kiçik sahibkarın fəaliyyəti çətinləşib, ölkə üzrə malların çatdırılmasında problemlər yaranıb. Ekspertlər hesab edir ki, bu, neft emalı zavodlarına hücumlar qədər ciddi iqtisadi təsir göstərə bilər.
Britaniyalı ekspert Mark Qaleotti bildirib ki, Ukrayna gözlənilməz uğur qazanıb və bu, tədricən hakimiyyətə ictimai dəstəyi zəiflədir. Analitik Natiya Seskuriya isə logistika mərkəzlərinə zərbələrin adi rusiyalı ailələrin gündəlik həyatına birbaşa təsir etdiyini və bunun Ukraynanın düşünülmüş strategiyası olduğunu deyib.
Kreml üçün yeni siyasi risklər
Məqalədə qeyd olunur ki, hücumlardan sonra sosial şəbəkələrdə mallarını və gəlir mənbələrini itirən sahibkarların çoxsaylı şikayətləri yayılıb. Bəzi istifadəçilər hakimiyyəti vacib infrastrukturu qoruya bilməməkdə açıq şəkildə ittiham edib ki, ekspertlərin fikrincə, bu, Rusiya üçün qeyri-adi haldır.
Keçmiş britaniyalı hərbi attaşe Con Forman hesab edir ki, cəbhədə vəziyyət uzun müddətdir ciddi dəyişməsə də, Rusiya iqtisadiyyatına yönəlmiş bu kampaniya daha uğurlu nəticələr verir. Onun sözlərinə görə, gələcəkdə məlumat emalı mərkəzləri və rabitə qovşaqları da potensial hədəflərə çevrilə bilər ki, bu da Kremlin qarşısında əlavə problemlər yaradar.
