Ukraynaya hərbi yardımın sürətləndirilməsi məsələsi Vaşinqtonda yenidən siyasi mübahisələrin mərkəzinə çevrilib. Pentaqonun yardımın ayrılmasını ləngitməsi Konqresdə narazılığı gücləndirib




 
Moderator.az xəbər verir ki, bu barədə "Reuters" agentliyi məlumat yayıb.
 
Konqres Pentaqonu tənqid edir
 
Məlumatda deyilir ki, Konqres üzvləri Tramp administrasiyasını Kiyevə ayrılmış vəsaitin xərclənməsini ləngitməkdə tənqid edir. Yardımın tam çatdırılması yalnız 2029-cu ilə qədər mümkün ola bilər. ABŞ prezidenti Donald Trampın administrasiyası Konqresə bildirib ki, Ukraynaya ayrılmış 400 milyon dollarlıq yardımın tam xərclənməsi 2029-cu maliyyə ilinə qədər uzana bilər.

Mənbələrin sözlərinə görə, may ayında Pentaqon qanunvericilərə vəsaitin mərhələli xərclənməsi ilə bağlı plan göndərib. Lakin iki ay keçməsinə baxmayaraq, vəsaitin əhəmiyyətli hissəsi nə ayrılıb, nə də müqavilələrlə rəsmiləşdirilib. Bu isə həm demokratların, həm də bəzi respublikaçı senatorların narazılığına səbəb olub.
 
Konqres Pentaqonun qrafikindən narazıdır
 
Qanunvericilər hesab edirlər ki, Pentaqonun müəyyən etdiyi qrafik Ukraynada davam edən müharibənin reallıqlarına uyğun deyil. Hazırkı plana əsasən, yardımın əsas hissəsi 2026-cı maliyyə ili ərzində ayrılacaq, bütün çatdırılmaların tamamlanması isə 30 sentyabr 2029-cu ilədək nəzərdə tutulur.

"Reuters"-in məlumatına görə, Vladimir Zelenskinin Vaşinqton səfəri zamanı əsas mövzulardan biri də məhz hava hücumundan müdafiə vasitələrinin təcili tədarükü və ABŞ ilə pilotsuz uçuş aparatları sahəsində əməkdaşlığın genişləndirilməsi olacaq. Gözlənilir ki, Ağ evdə Donald Trampla görüşdən sonra Zelenski Senatda bütün 100 senatorla da görüş keçirəcək.
 
Yardımın gecikməsi narahatlıq doğurur
 
Konqres üzvləri dəfələrlə administrasiyanı Ukraynaya ayrılmış vəsaitin icrasında ləng davranmaqda ittiham ediblər. Onların fikrincə, Rusiya raket hücumlarını davam etdirdiyi bir vaxtda yardımın illərlə uzadılması Kiyevin müdafiə imkanlarına mənfi təsir göstərə bilər.
 
Bununla yanaşı, "Reuters" daha əvvəl yazıb ki, ABŞ və Ukrayna Rusiyaya təqdim olunacaq yeni sülh təklifini hazırlayır. Kiyev hesab edir ki, Rusiyaya qarşı iqtisadi təzyiqin və uzaqmənzilli zərbələrin artması Kremlin mövqeyini dəyişməyə məcbur edə bilər. Kremlin sözçüsü Dmitri Peskov isə bu məlumatları təsdiqləməyərək onları vaxtından əvvəl yayılan media xəbərləri adlandırıb.