"Tehran hücum nəticəsində dəyən ziyanın ödənilməsini tələb edir..."




 
İran Xəzər dənizində İran ticarət gəmisinə endirilən zərbəyə cavab olaraq Ukraynanın Qara dəniz limanlarından birinə ballistik raket zərbəsi endirməyi nəzərdən keçirib. 
 
Moderator.az xəbər verir ki, bu barədə "nyt.com" nəşri yazıb.
 
İranın mümkün cavab planı
 
Nəşr yazır ki, Avropa və İran rəsmilərinin sözlərinə görə, intensiv diplomatik təmaslar hələlik vəziyyətin gərginləşməsinin qarşısını alıb. Mənbələrin bildirdiyinə görə, Tehranda simvolik xarakter daşıyan, kiçik döyüş başlığı ilə təchiz edilmiş ballistik raketdən istifadə variantı müzakirə olunub.
 
Ehtimal edilən hədəflərdən biri Ukraynanın Qara dənizdəki limanlarından biri olub. Nəşr vurğulayır ki, belə bir zərbə İran-Ukrayna qarşıdurmasını kəskin şəkildə dərinləşdirə və daha geniş regional münaqişəyə səbəb ola bilər.
 
Diplomatik təmaslar və xəbərdarlıqlar

İran rəsmiləri mümkün cavab zərbəsindən sonra gərginliyin azalacağına ümid etdiklərini bildirib. Lakin Qərb rəsmiləri Ukraynanın reaksiyasını əvvəlcədən proqnozlaşdırmağın mümkün olmadığını qeyd edib.
 
İrana yaxın analitik Mehdi Rəhməti isə Ukraynaya qarşı yeni cəbhə açmağın Tehran üçün heç bir üstünlük yaratmayacağını bildirib. Nəşr qeyd edir ki, hazırda diplomatik səylər vəziyyəti sabitləşdirsə də, bunun nə qədər davam edəcəyi məlum deyil.
 
Kiyev və Tehranın mövqeyi
 
Ukrayna xarici işlər naziri vəzifəsini icra edən Andrey Sıbiqa iranlı həmkarı Abbas Araqçı ilə telefon danışığı apararaq Kiyevin eskalasiyada maraqlı olmadığını və bütün hərəkətlərinin yalnız Rusiya təcavüzündən müdafiəyə yönəldiyini bildirib. O, eyni zamanda İranı Rusiyanın müharibəsinə dəstəyi dayandırmağa çağırıb.
 
Araqçı isə Ukrayna tərəfinin İran gəmisinə hücumun qəsdən edilmədiyini və gərginliyin artırılmasının istənilmədiyini təsdiqlədiyini bildirib. Bununla yanaşı, Tehran hücum nəticəsində dəyən ziyanın ödənilməsini tələb edib.