ABŞ bir neçə günlük fasilədən sonra İrana yenidən hava zərbələri endirib. Vaşinqton bunu İranın ABŞ hərbi obyektlərinə hücum cəhdinə cavab kimi qiymətləndirir.
Moderator.az xəbər verir ki, bu barədə "vesty.co" nəşri məlumat yayıb.
ABŞ zərbələri bərpa etdi
Məlumatda deyilir ki, ABŞ ordusu İranın cənubunda, o cümlədən Bəndər-Abbas, Kiş və Qeşm adaları, həmçinin Xuzistan əyalətində yerləşən hədəflərə zərbələr endirib. İran mediası yaşayış məntəqələrinə də ziyan dəydiyini, yaralananların olduğunu açıqlayıb.
Tramp daha əvvəl İrana sərt cavab veriləcəyini bəyan etmiş və "İndi növbə bizdədir" deyib. ABŞ Mərkəzi Komandanlığının məlumatına görə, əməliyyat İranın hərbi infrastrukturuna qarşı həyata keçirilib. Məlumatda eyni zamanda Donald Trampın yaxın aylarda genişmiqyaslı müharibədən yayınmağa çalışdığı bildirilir
"Əvvəl seçkilər, sonra qərar"
İsrail və Yaxın Şərqdəki qiymətləndirmələrə görə, Tramp noyabrda keçiriləcək aralıq seçkilərinədək İranla genişmiqyaslı müharibədən yayınmağa çalışır. Buna səbəb həm ABŞ-də müharibəyə dəstəyin zəif olması, həm də enerji bazarındakı risklər və hərbi ehtiyatların bərpası zərurətidir.
Bununla yanaşı, Vaşinqtonda hesab edirlər ki, Tehranla danışıqlar nəticə verməyəcək və seçkilərdən sonra ABŞ ilə İran arasında daha geniş qarşıdurma ehtimalı qalır. Bu ssenaridə İsrailin də iştirak edə biləcəyi istisna edilmir.
Gərginlik regiona yayılır
Bu arada Səudiyyə Ərəbistanı ilk dəfə ABŞ ilə birlikdə İraqda İranın dəstəklədiyi silahlı qruplaşmalara zərbələr endirib. İordaniya isə səhər saatlarında İranın atdığı beş raketi havada məhv etdiyini açıqlayıb. Regionda gərginliyin artması fonunda Vaşinqton və müttəfiqləri həm hərbi, həm də iqtisadi təzyiqi gücləndirməyə hazırlaşırlar.
