Yaponiyada hökm sürən rekord isti hava dalğası təkcə insanlara deyil, heyvanlara da ağır təsir göstərib. Tokiodakı Tama Zooloji Parkında üç dişi şir istilik stressi nəticəsində tələf olub, bir neçə digər şirin vəziyyəti isə ağır olaraq qalır.
Moderator.az xəbər verir ki, bu barədə Cursorinfo məlumat yayıb.
Zoopark rəhbərliyinin bildirdiyinə görə, iyulun ortalarından etibarən şirlərdə hərəkətsizlik, iştahsızlıq və ümumi halsızlıq müşahidə olunmağa başlayıb. Parkda saxlanılan 16 şirdən 10-u – səkkiz dişi və iki erkək – baytarlıq nəzarətinə götürülüb.
Bəzi heyvanların vəziyyəti kəskin pisləşərək ayağa qalxa bilməyəcək həddə çatıb. Baytarlar onların bədən temperaturunu aşağı salmaq üçün su püskürtmə sistemlərindən, venadaxili mayelərdən və digər intensiv müalicə üsullarından istifadə ediblər.
İlk ölən şir 2022-ci ilin sentyabrında zooparkda doğulan üç yaşlı Mugi olub. O, iyulun 28-də tələf olub. Daha sonra 11 yaşlı İçiqo iyulun 31-də, 15 yaşlı Luana isə avqustun 2-də ölüb.
Hadisədən sonra şirlərin saxlanıldığı bölmə ziyarətçilər üçün bağlanıb, safari avtobusunun fəaliyyəti də müvəqqəti dayandırılıb.
Zoopark nümayəndələrinin sözlərinə görə, şirlər isti iqlimə uyğunlaşmış heyvanlar hesab olunsa da, Yaponiyanın yüksək rütubətli yayı Afrikanın daha quru iqlimindən fərqlənir və bu, istiliyin təsirini daha da gücləndirir. Buna görə ventilyasiya sistemi təkmilləşdirilib, su püskürtmə artırılıb və əlavə soyutma avadanlıqları quraşdırılıb.
Hazırda ağır vəziyyətdə olan üç şir müalicəsini davam etdirir. Onlara maye terapiyası, qaraciyəri dəstəkləyən preparatlar, vitaminlər və digər müalicə tədbirləri tətbiq edilir.
Qeyd edək ki, Yaponiyada son həftələrdə bəzi bölgələrdə havanın temperaturu 40 dərəcəyə yaxınlaşıb. Rəsmi məlumatlara görə, təkcə 20–26 iyul tarixləri arasında təxminən 18 min 600 nəfər isti vurması diaqnozu ilə xəstəxanaya yerləşdirilib, onlardan 45-i həyatını itirib. Alimlər isə iqlim dəyişikliyinin ekstremal istilərin daha tez-tez və daha şiddətli baş verməsinə səbəb olduğunu bildirirlər.
