ABŞ-ın İranla davam edən hərbi qarşıdurması Vaşinqtonun strateji silah ehtiyatlarına ciddi təzyiq yaradır. Uzunmüddətli hərbi əməliyyatlar ABŞ-ın Avropa və Asiyada mümkün böhranlara eyni vaxtda hazır olmaq imkanlarını da məhdudlaşdıra bilər.
Moderator.az xəbər verir ki, bu barədə “The New York Times” nəşri məlumat yayıb.
ABŞ qüvvələri Yaxın Şərqdə əməliyyatlar zamanı çox sayda bahalı raket və digər yüksək texnologiyalı sursatlardan istifadə edib. Xüsusilə “Patriot” hava hücumundan müdafiə raketlərinin sürətlə tükənməsi narahatlıq doğurur. Məlumata görə, hərbi əməliyyatlar ərzində 1500-dən çox belə raketdən istifadə olunub və ehtiyatların bərpası təxminən iki il çəkə bilər.
Yaxın Şərqə əlavə resursların yönəldilməsi ABŞ-ın Avropa və Hind-Sakit Okean regionlarındakı imkanlarına da təsir göstərə bilər. Bu, xüsusilə Tayvan ətrafında mümkün böhran və ya Koreya yarımadasında eskalasiya zamanı Vaşinqtonun operativ reaksiya imkanları ilə bağlı suallar yaradır.
ABŞ müdafiə sənayesi istehsal gücünü artıra bilsə də, mürəkkəb raket sistemlərinin ehtiyatını qısa müddətdə bərpa etmək çətindir. Vaşinqton artıq ən çox tələb olunan silahların istehsalını artırmaq üçün müdafiə şirkətləri ilə əməkdaşlığı genişləndirir.
Bu proses Rusiya və Çinin də diqqətindədir. Moskva və Pekin ABŞ-ın sursat istehlakını, hərbi qüvvələrinin yerləşdirilməsini və ehtiyatların bərpasına lazım olan müddəti izləyirlər.
Vaşinqton isə ABŞ Silahlı Qüvvələrinin döyüş hazırlığını qoruduğunu və qarşıya qoyulan tapşırıqları yerinə yetirmək imkanına malik olduğunu bildirir.
İranla qarşıdurmanın uzanması ABŞ arsenalının əvvəlki səviyyəyə qaytarılması üçün daha çox vaxt tələb edə və Vaşinqtonun eyni vaxtda bir neçə potensial rəqibi çəkindirmək imkanlarına əlavə təzyiq yarada bilər.
