Bağırsaq mikrobiomunun sağlamlığı həzm sisteminin normal fəaliyyəti və ümumi rifah üçün mühüm əhəmiyyət daşıyır. Mütəxəssislər düzgün içki seçiminin də bu prosesə müsbət təsir göstərə biləcəyini bildirirlər.
Moderator.az xəbər verir ki, bu barədə "Real Simple" yazıb. Sertifikatlı qidalanma mütəxəssisləri 75 klinik tədqiqatın nəticələrini təhlil edərək bağırsaq sağlamlığını dəstəkləyən ən faydalı içkiləri müəyyənləşdiriblər.
Dietoloqların fikrincə, əsas faydalı komponentlər probiotiklər, prebiotiklər və antioksidantlardır. Siyahıda ilk beşlik belədir:
1. Kefir
Fermentləşdirilmiş süd içkisi olan kefir probiotiklərlə zəngindir. O, bağırsaq mikroflorasının müxtəlifliyini dəstəkləməklə yanaşı, orqanizmi protein və kalsiumla təmin edir.
2. Kombuça(dərman məqsədləri üçün istifadə edilən fermentləşdirilmiş bir çaydır)
Fermentləşdirilmiş çay olan kombuça tərkibindəki faydalı birləşmələr sayəsində bağırsaq sağlamlığına və orqanizmin müdafiə sisteminə dəstək verə bilər.
3. Zəncəfil çayı
Zəncəfil uzun illərdir ürəkbulanma və həzm problemlərinin yüngülləşdirilməsində istifadə olunur. Onun tərkibindəki bioaktiv maddələr həzm sisteminin fəaliyyətinə müsbət təsir göstərə bilər.
4. Sümük bulyonu
Kollagen və qlütamin kimi amin turşuları ilə zəngin olan sümük bulyonunun bağırsaq divarının bütövlüyünün qorunmasına və orqanizmin maye balansına töhfə verə biləcəyi bildirilir.
5. Nanə çayı
Nanə çayı xüsusilə həzm sistemi həssas olan insanlar üçün faydalı ola bilər. O, hamar əzələləri rahatlaşdıraraq qarında yaranan narahatlığın azalmasına kömək edə bilər.
Şəkərli içkilərə diqqət
Dietoloqlar “bağırsaq sağlamlığı” adı ilə satılan hazır içkilərə də ehtiyatla yanaşmağı tövsiyə edirlər. Belə məhsulların bəzilərində yüksək miqdarda şəkər ola bilər. Mütəxəssislər mümkün qədər az emal olunmuş və tərkibi sadə fermentləşdirilmiş məhsullara üstünlük verməyi məsləhət görürlər.
