Pişiklərin bəzən iti xatırladan yüksək və uzun səslər çıxarması sahiblərini narahat edə bilər. Baytarların sözlərinə görə, bu davranışın müxtəlif səbəbləri var və hər zaman xəstəlik əlaməti olmaya bilər.
Moderator.az "Live Science" portalına istinadən xəbər verir ki, pişiklər yüksək və sərt səslərlə qorxu, narahatlıq, ərazi münaqişəsi və ya diqqət ehtiyacını ifadə edə bilərlər. Paris-Nanter Universitetindən Şarlotta de Mouzonun sözlərinə görə, bu tip səslənmələr daha çox mənfi emosiyalarla əlaqəli olsa da, bəzi hallarda müsbət vəziyyətlərdə də müşahidə edilə bilər.
Vəhşi pişiklərdə də buna bənzər səslər ərazini qorumaq və digər heyvanları xəbərdar etmək məqsədi daşıyıb. Kornell Universitetindən Ketrin Anderson isə pişiklərin qorxu, digər heyvanlarla qarşıdurma və cütləşmə dövründə də ulamaya bənzər səslər çıxara bildiyini bildirir.
Bununla yanaşı, qəfil və davamlı ulama sağlamlıq probleminin əlaməti ola bilər. Xüsusilə yaşlı pişiklərdə hipertiroidizm və insanlardakı demensiyaya bənzər koqnitiv disfunksiya sindromu bu davranışla müşayiət oluna bilər.
Uzun müddət davam edən yüksək səslənmə həmçinin ağrı, ayrılıq stresi və ya güclü narahatlıqla bağlı ola bilər. Buna görə də pişiyin davranışında qəfil və nəzərəçarpacaq dəyişiklik yaranarsa, səbəbi müəyyənləşdirmək üçün baytar həkimə müraciət etmək tövsiyə olunur.
