Gündəlik qidalanmada sağlam hesab etdiyimiz bəzi məhsulların həddindən artıq istehlakı oynaq və sümük sağlamlığına mənfi təsir göstərə bilər. Xüsusilə bəzi qidalar orqanizmdə iltihabi prosesləri gücləndirə, sidik turşusunun səviyyəsini artıra və oynaq ağrılarının yaranmasına və ya şiddətlənməsinə səbəb ola bilər.
Moderator.az “Cursorinfo”ya istinadla xəbər verir ki, mütəxəssislər oynaq sağlamlığını qorumaq üçün qidalanmada balans yaratmağı və müəyyən məhsulların həddindən artıq qəbulundan çəkinməyi tövsiyə edirlər.
Bunlar aşağıdakılardır:
İspanaq
Vitamin və minerallarla zəngin olan ispanağın tərkibində oksalatlar da var. Bu maddələr xüsusilə böyrək daşı yaranmasına meyilli insanlarda problem yarada bilər.
İspanağı tamamilə rasiondan çıxarmaq lazım deyil. Sadəcə, müxtəlif tərəvəzlərlə birlikdə balanslı şəkildə istehlak etmək daha məqsədəuyğundur.
Qırmızı ət
Qırmızı ətin həddindən artıq qəbulu orqanizmdə sidik turşusunun səviyyəsini artıra bilər. Bu isə xüsusilə podaqraya meyilli insanlarda oynaqlarda urat kristallarının toplanmasına və ağrıya səbəb ola bilər.
Şirniyyat və qazlı içkilər
Şəkərlə zəngin məhsulların çox istifadəsi orqanizmdə iltihabi proseslərlə əlaqələndirilir. Şəkərli qazlı içkilər isə artıq çəkiyə səbəb olaraq diz və digər oynaqlara düşən yükü artıra bilər.
Bu səbəbdən şirniyyatların və şəkərli içkilərin miqdarını azaltmaq, suya və daha az emal olunmuş məhsullara üstünlük vermək məsləhətdir.
Alkoqol
Alkoqollu içkilərin müntəzəm və həddindən artıq qəbulu sidik turşusunun səviyyəsinə təsir göstərə bilər. Xüsusilə podaqra (sidik turşusunun artması və oynaqlarda duz kristalları kimi toplanması ilə yaranan ağrılı xəstəlikdir) problemi olan insanlarda alkoqol oynaq ağrılarının və xəstəlik tutmalarının şiddətlənməsinə səbəb ola bilər.
Oynaqları necə qorumaq olar?
Mütəxəssislər balanslı qidalanma ilə yanaşı, kifayət qədər su içməyi və müntəzəm fiziki aktivliyi tövsiyə edirlər. Rasionda tərəvəz, meyvə, tam taxıllar və kalsiumla zəngin məhsulların olması, şəkərli və yüksək dərəcədə emal olunmuş qidaların isə məhdudlaşdırılması oynaq sağlamlığı üçün daha düzgün seçimdir.
Əsas məsələ hər hansı bir qidanı tamamilə qadağan etmək deyil, müxtəlif və balanslı qidalanmaya üstünlük verməkdir.
