Londonda neyrocərrahlar beyin şişinin çıxarılması əməliyyatında süni intellektdən real vaxt rejimində istifadə ediblər.
Moderator.az xəbər verir ki, bu barədə "The Guardian" nəşri yazıb.
Əməliyyat Milli Nevrologiya və Neyrocərrahiyyə Xəstəxanasında 48 yaşlı kişi üzərində aparılıb. Xəstədə görmə ilə əlaqəli mühüm damar və sinirlərin yaxınlığında yerləşən kiçik hipofiz şişi aşkarlanıb.
Belə əməliyyatlarda kiçik bir səhv belə görmə itkisi, insult və digər ciddi fəsadlara səbəb ola bilər. Bu səbəbdən cərrahlar əməliyyat zamanı süni intellekt əsaslı sistemdən də yararlanıblar.
Sistem cərrahi kameradan daxil olan görüntüləri real vaxtda təhlil edərək damarları, sinirləri, toxumaları və cərrahi alətləri ayırd etməyə, həmçinin mühüm anatomik strukturları vurğulamağa kömək edib.
Lakin süni intellekt əməliyyatı özü idarə etməyib və heç bir müstəqil qərar qəbul etməyib. Bütün qərarlar və cərrahi müdaxilələr həkimlərin nəzarətində olub.
Sistemin hazırlanması zamanı yüzlərlə real beyin əməliyyatının videoyazısından istifadə edilib. Süni intellekt bu görüntülər əsasında müxtəlif anatomik strukturları tanımağı öyrənib.
Həkimlərin bildirdiyinə görə, xəstə əməliyyatdan sonra sürətlə sağalıb. Bir həftə ərzində müstəqil hərəkət etməyə başlayıb, görmə qabiliyyəti əhəmiyyətli dərəcədə yaxşılaşıb və sonradan işinə qayıdıb.
Mütəxəssislər hesab edirlər ki, real vaxt rejimində çalışan bu cür süni intellekt sistemləri gələcəkdə neyrocərrahlar üçün mühüm əlavə vasitəyə çevrilə bilər. Bununla belə, texnologiyanın məqsədi həkimi əvəz etmək deyil, əməliyyat zamanı ona əlavə vizual məlumat təqdim etməkdir.
