Alimlər insan orqanizmində iştahanın və xüsusilə yüksək yağ tərkibli qidalara olan istəyin necə tənzimləndiyini müəyyənləşdiriblər.
Moderator.az xəbər verir ki, bu barədə “ScienceAlert” məlumat yayıb.
Tədqiqat zamanı alimlər iştahaya nəzarətdə və yağlı qidalara üstünlük verilməsində mühüm rol oynayan "OPA1" zülalını müəyyən ediblər. Araşdırmanın nəticələri göstərib ki, bu zülalın hipotalamusdakı neyronlarda fəaliyyəti qidalanma davranışının formalaşmasına təsir göstərir.
Alimlər "OPA1" zülalının çatışmazlığı olan siçanlar üzərində təcrübələr aparıblar. Müşahidələr zamanı həmin heyvanların, xüsusilə dişilərin, daha çox yeməyə, yağlı qidalara üstünlük verməyə və sürətlə çəki almağa meylli olduqları müəyyən edilib.
Tədqiqatın maraqlı nəticələrindən biri də erkək və dişi siçanlar arasında fərqin müşahidə olunmasıdır. Normal erkək siçanlarda yağlı qidalarla qidalanma "OPA1" zülalının səviyyəsinin artmasına səbəb olub. Dişi siçanlarda isə belə dəyişiklik qeydə alınmayıb.
"OPA1" çatışmazlığı olan siçanlar daha çox qida qəbul edib və soya yağı kimi yağlı qidalara daha çox üstünlük veriblər. Yaş artdıqca xüsusilə dişi siçanlarda çəki artımının daha sürətli olduğu müşahidə olunub.
Alimlər həmçinin müəyyən ediblər ki, OPA1 zülalı çatışmayan heyvanlar iştahanı azaldan dərmanlara daha zəif reaksiya göstərirlər.
Tədqiqatçılar hesab edirlər ki, əldə olunan nəticələr beyində iştahanın və qida seçiminin tənzimlənməsi mexanizmlərinin daha yaxşı başa düşülməsinə kömək edə bilər. Eyni zamanda, nəticələr gələcəkdə piylənmənin müalicəsində fərdi yanaşmaların hazırlanması üçün yeni imkanlar yarada bilər.
Araşdırma həmçinin qadın və kişilərdə iştahanın tənzimlənməsi mexanizmlərinin fərqli ola biləcəyinə dair yeni suallar ortaya qoyur.
