İnsult riskini azaltmağın əsas yollarından biri qan təzyiqini nəzarətdə saxlamaqdır. Bununla yanaşı, düzgün qidalanma, fiziki aktivlik və digər sağlam həyat tərzi vərdişləri ürək-damar sağlamlığının qorunmasında mühüm rol oynayır.
Moderator.az “TechInsider”ə istinadən xəbər verir ki, mütəxəssislər qan təzyiqinin və damar sağlamlığının qorunmasına kömək edə biləcək bir sıra qidaları açıqlayıblar.
Yağlı balıq
Somon, skumbriya və sardina kimi yağlı balıqlar Omeqa-3 yağ turşuları ilə zəngindir. Onların müntəzəm istehlakı ürək və damarların sağlamlığına müsbət təsir göstərə bilər.
Yulaf
Liflə zəngin yulaf LDL – “pis” xolesterolun səviyyəsinin aşağı salınmasına kömək edir. Bu isə ürək-damar xəstəlikləri riskinin azalması baxımından əhəmiyyətlidir.
Tünd rəngli giləmeyvələr
Qaragilə, qarağat və digər tünd giləmeyvələr antioksidantlarla zəngindir. Bu maddələr damarların sağlamlığının və normal qan dövranının qorunmasına kömək edir.
Süd məhsulları
Süd və bəzi süd məhsullarının tərkibindəki kalsium, kalium və maqnezium qan təzyiqinin normal səviyyədə saxlanmasına dəstək verə bilər. Lakin seçim zamanı yağ və duz miqdarına diqqət yetirmək tövsiyə olunur.
Banan
Banan kalium mənbəyidir. Kalium orqanizmdə natriumun təsirini balanslaşdırmağa və qan təzyiqinin tənzimlənməsinə kömək edir.
Balqabaq toxumu
Balqabaq toxumları maqneziumla zəngindir. Maqnezium ürəyin və qan damarlarının normal fəaliyyəti üçün vacib minerallardan hesab olunur.
İspanaq
İspanağın tərkibində maqnezium, kalium və folat var. Bu maddələr ürək-damar sisteminin sağlamlığının qorunmasında mühüm rol oynayır.
Badam
Badam faydalı yağlar və E vitamini ilə zəngindir. Ölçülü miqdarda istehlakı xolesterol səviyyəsinin və damar sağlamlığının qorunmasına kömək edə bilər.
Mütəxəssislər bildirirlər ki, təkcə müəyyən qidaların istehlakı insultun qarşısını almağa zəmanət vermir. Qan təzyiqinə nəzarət, siqaretdən uzaq durmaq, fiziki aktivlik, sağlam çəkinin qorunması və həkim tərəfindən təyin edilən müalicəyə əməl etmək də insult riskinin azaldılmasında mühüm əhəmiyyət daşıyır.
