Dubaydan İsrailə uçan “Flydubai” reysindəki hadisədən beş gün sonra sərnişinlərin bir qismi hələ də yaşadıqları ağır stressin təsirlərindən əziyyət çəkir. Onlar kifayət qədər psixoloji və maddi dəstək almadıqlarını bildirirlər.
Moderator.az “Ynet” portalına istinadla xəbər verir ki, sərnişinlər İsrailə qayıtdıqdan sonra dövlət qurumlarına müraciət etsələr də, onlara əsasən aviaşirkətlə əlaqə saxlamaları tövsiyə olunub. Sərnişinlərin sözlərinə görə, bir çoxunda yuxusuzluq, narahatlıq və güclü stress müşahidə olunur.
Ben Qurion Hava Limanında sərnişinləri Milli Dözümlülük Mərkəzinin mütəxəssisləri və təcili yardım briqadası qarşılayıb. Səhiyyə Nazirliyi isə həmin vaxt heç kimin təcili psixoloji yardıma ehtiyacının olmadığını açıqlayıb. Bununla belə, bəzi sərnişinlər məsləhət almaq üçün müraciət edib.
Sərnişinlərdən Daniela Elmaliah yaşadıqlarından sonra vəziyyətinin yaxşı olmadığını bildirib:
“Çox çətinliklə yatıram və çox az yeyirəm. Sanki o uçuşu yenidən yaşayıram. Hər səsə əsəbiləşirəm, titrəyirəm. Tez-tez ağlayıram. Sadəcə başqa çarəm olmadığı üçün işə qayıtdım”.
Elmaliah bildirib ki, İsrailə qayıtdıqdan sonra nə onunla, nə də digər sərnişinlərlə birbaşa əlaqə saxlanılıb. Onlar psixoloji dəstək və mümkün kompensasiya ilə bağlı məlumatları özləri axtarmağa məcbur olublar.
Səhiyyə Nazirliyi sərnişinlərin vəziyyətinin izlənildiyini və digər dövlət qurumları ilə birlikdə əlavə dəstək tədbirlərinin nəzərdən keçirildiyini açıqlayıb.
Mütəxəssislərin sözlərinə görə, ciddi hadisədən sonra ilk günlərdə yuxusuzluq, narahatlıq və enerji itkisi normal stress reaksiyası ola bilər və bu əlamətlər öz-özlüyündə psixi pozuntu anlamına gəlmir. Sərnişinlərə tədricən normal həyatlarına qayıtmaq, yaxınlarının dəstəyindən yararlanmaq və ehtiyac olduqda peşəkar yardıma müraciət etmək tövsiyə olunur.
Nəqliyyat Nazirliyi bildirib ki, sərnişinlərə kompensasiya ödənilməsinə görə məsuliyyət “Flydubai”nin üzərinə düşür. Nazirlik Monreal Konvensiyasına istinad edərək sərnişinlərin mənəvi və fiziki ziyana görə aviaşirkətdən kompensasiya tələb edə biləcəyini, zərurət yaranarsa bunun məhkəmə yolu ilə də həyata keçirilə biləcəyini qeyd edib.
