Oktyabrın 8-də Ermənistanın baş naziri Nikol Paşinyanla İran prezidenti Məsud Pezeşkian Türkmənistanın Avaza milli turizm zonasında Xəzər Ekologiya Sammiti və MDB Dövlət Başçıları Şurasının iclası çərçivəsində görüşüblər. Tərəflər iki ölkə arasında münasibətlərin yaxın gələcəkdə yeni səviyyəyə yüksələcəyinə ümid ifadə ediblər.
 




Moderator.az xəbər verir ki, bu barədə ilkin xəbər NEWS.am-da yayılıb. Məlumata görə, görüşdə Ermənistan-İran münasibətlərinin inkişafı, yüksək səviyyəli təmasların intensivləşdirilməsi və əməkdaşlıq gündəliyinin genişləndirilməsi məsələləri diqqət mərkəzində olub.
 
Paşinyan iki ölkə arasında əməkdaşlıq üçün geniş imkanların olduğunu vurğulayıb və İran şirkətlərinin Ermənistanda strateji layihələrə cəlb edilməsinə diqqət çəkib. Tərəflər qarşılıqlı səfərlərin davam etdirilməsinin vacibliyini də qeyd ediblər.
 
İran Ermənistanla nəqliyyat və enerji əlaqələrini genişləndirir...
 
Ermənistan-İran münasibətlərində son dövrdə nəqliyyat və enerji infrastrukturu xüsusi əhəmiyyət daşıyır. Ermənistan Xarici İşlər Nazirliyinin oktyabrın 5-də yaydığı məlumata görə, həmin gün Ermənistanın xarici işlər və beynəlxalq ticarət naziri Ararat Mirzoyan Tehranda İran prezidenti Məsud Pezeşkianla görüşüb. Danışıqlarda regional kommunikasiyaların inkişafı, enerji sahəsində qarşılıqlı faydalı layihələr və TRIPP layihəsinin icra prosesi müzakirə olunub.
 
Həmin gün Mirzoyan İranın xarici işlər naziri Abbas Əraqçi ilə də görüş keçirib. Ermənistan XİN-in məlumatında iki ölkə arasında sərhəddə ikinci körpünün tikintisinin və üçüncü elektrik ötürücü xəttinin inşasının tezliklə tamamlanmasının vacibliyi vurğulanıb. Yükdaşımaların asanlaşdırılması və regional nəqliyyat bağlantılarının genişləndirilməsi də müzakirə mövzuları sırasında olub.
 
İran tərəfi Ermənistanın irəli sürdüyü “Sülh qovşağı” layihəsinə dəstəyini ifadə edib. Mirzoyan isə TRIPP layihəsinin icrası istiqamətində görülən işlər və onun region ölkələri üçün yarada biləcəyi imkanlar barədə məlumat verib.

Bu yaxınlaşma region üçün nə deməkdir?..
 
Ermənistan və İran arasında siyasi dialoqun intensivləşməsi Cənubi Qafqazda nəqliyyat marşrutları, enerji infrastrukturu və regional iqtisadi əlaqələr baxımından diqqət çəkir.
 
İran üçün Ermənistanla əlaqələrin inkişafı şimal istiqamətində nəqliyyat və iqtisadi əlaqələrin genişləndirilməsi baxımından əhəmiyyətlidir. Ermənistan isə İranla əməkdaşlıq vasitəsilə enerji və tranzit imkanlarını artırmağa çalışır.
 
Azərbaycan baxımından da bu proseslər əhəmiyyətlidir. Regionda kommunikasiyaların açılması, yeni marşrutların formalaşması və TRIPP layihəsinin gələcək icrası Cənubi Qafqazın nəqliyyat xəritəsinə təsir göstərə biləcək məsələlərdir. Bununla belə, son görüşün nəticələrinə əsasən tərəflər arasında Azərbaycana qarşı yönəlmiş hər hansı konkret razılaşmanın əldə olunduğunu iddia etmək üçün əsas yoxdur.
 
Hələlik açıqlanan məlumatlar Ermənistan və İranın siyasi təmasları dərinləşdirmək, enerji və nəqliyyat sahələrində əməkdaşlığı genişləndirmək niyyətini göstərir. Bu niyyətin hansı konkret layihələr və razılaşmalarla nəticələnəcəyi isə qarşıdakı dövrdə aydınlaşacaq. 
 
S.Laçın