Duzlu qidalara qarşı həssaslığın azalması sağlamlıqla bağlı müəyyən risklərin göstəricisi ola bilər. Yapon alimlərinin apardığı araşdırmada duzluluğu daha zəif hiss edən insanlarda vaxtından əvvəl ölüm riskinin daha yüksək olduğu müəyyənləşdirilib.
Moderator.az “JAMA Otolaryngology–Head & Neck Surgery” nəşrinə istinadla xəbər verir ki, araşdırmada 40 və daha yuxarı yaşda olan 6 mindən çox insan iştirak edib.
Tədqiqat zamanı iştirakçılardan müxtəlif konsentrasiyalarda duz məhlullarını dadaraq duzluluğu nə dərəcədə hiss etdiklərini müəyyənləşdirmək istənilib.
Nəticələrə görə, duzluluğa qarşı həssaslığı ən aşağı olan şəxslərin növbəti 18 il ərzində hər hansı səbəbdən ölüm riski yüksək həssaslığa malik iştirakçılarla müqayisədə təxminən 20 faiz daha çox olub.
Alimlər bu əlaqənin yaş, cins, fiziki aktivlik, zərərli vərdişlər və qidalanma kimi amillər nəzərə alındıqdan sonra da müşahidə edildiyini bildiriblər.
Tədqiqatçılara görə, duzluluğu zəif hiss edən insanlar yeməyin dadını artırmaq üçün daha çox duz istifadə edə bilər. Bu isə yüksək qan təzyiqi və ürək-damar problemləri ilə əlaqəli ola bilər. Dad hissindəki dəyişikliklərin bəzi böyrək və digər sağlamlıq problemləri ilə bağlı olması da mümkündür.
Bununla belə, mütəxəssislər araşdırmanın müşahidə xarakterli olduğunu və duza qarşı həssaslığın azalmasının erkən ölümə birbaşa səbəb olduğunu sübut etmədiyini vurğulayırlar.
Alimlər bildirirlər ki, əldə olunan nəticələr dad hissindəki dəyişikliklərin ümumi sağlamlıq vəziyyətinin qiymətləndirilməsi zamanı nəzərə alınmasının əhəmiyyətini göstərir.
