10 oktyabr Ümumdünya Psixi Sağlamlıq Günü kimi qeyd olunur. 
 




Bu gün psixi sağlamlığın insan həyatındakı əhəmiyyətinə diqqət çəkmək, cəmiyyətdə psixoloji maarifləndirməni artırmaq və insanları öz emosional rifahlarına daha həssas yanaşmağa təşviq etmək məqsədi daşıyır. 
 
Psixi sağlamlıq yalnız hər hansı psixoloji problemin olmaması deyil. Bu, insanın öz emosiyalarını tanıması, stress və çətinliklərin öhdəsindən daha sağlam şəkildə gəlməsi, münasibətlərini qoruması və gündəlik həyatında emosional balansını saxlaya bilməsidir.
 
 Müasir həyatın sürətli tempi, gündəlik məsuliyyətlər, iş və təhsil yükü, münasibətlərdə yaşanan çətinliklər və gələcəklə bağlı narahatlıqlar psixi sağlamlığımıza təsir göstərə bilər. Bəzən insan özünü yorğun, narahat, motivasiyasız və ya emosional olaraq tükənmiş hiss edə bilər. Bu hissləri görməzdən gəlmək əvəzinə onları anlamağa çalışmaq vacibdir.
 
Xüsusilə universitet mühitində tələbələr akademik yük, imtahan stressi, uyğunlaşma, sosial münasibətlər və gələcəklə bağlı narahatlıqlarla qarşılaşa bilərlər. Bu səbəbdən universitetlərdə psixi sağlamlıqla bağlı maarifləndirmə və psixoloji dəstəyin əlçatan olması tələbələrin ümumi rifahı üçün mühüm əhəmiyyət daşıyır.
 
Psixoloji yardım almaq zəiflik deyil. Əksinə, insanın özünə və psixi sağlamlığına məsuliyyətlə yanaşmasının göstəricisidir. İnsan yalnız çətinlik yaşadıqda deyil, özünü daha yaxşı tanımaq, emosiyalarını idarə etmək və şəxsi inkişafını dəstəkləmək üçün də psixoloji dəstək ala bilər. Psixi sağlamlığımızı qorumaq üçün özümüzə istirahət üçün vaxt ayırmaq, hisslərimizi ifadə etmək, sağlam sərhədlər müəyyənləşdirmək, yaxınlarımızla ünsiyyətdə olmaq və ehtiyac yarandıqda mütəxəssis dəstəyinə müraciət etmək vacibdir.
 
Unutmayaq ki, sağlamlıq yalnız fiziki vəziyyətimizlə deyil, düşüncələrimiz, hisslərimiz və daxili dünyamızla da bağlıdır. Özümüzə qayğı göstərmək isə zəiflik deyil, özümüzə verdiyimiz dəyərin göstəricisidir.
 
Nuranə Şahin
Azərbaycan Turizm və Menecment Universitetinin psixoloqu