Yuxu rejiminin pozulması və gec yatmaq orqanizmin qan şəkərini tənzimləmək qabiliyyətinə mənfi təsir göstərə bilər. Araşdırmaya görə, kifayət qədər yatmaq belə gecə yarısından sonra yuxuya getməyin metabolik təsirlərini tam aradan qaldırmaya bilər.
Moderator.az xarici mediaya istinadla xəbər verir ki, beynəlxalq alimlər qrupu yuxu rejimi ilə maddələr mübadiləsi arasındakı əlaqəni araşdırıb.
Tədqiqatda 953 nəfər iştirak edib. İki həftə ərzində iştirakçılar yuxu monitorları və qlükoza ölçən cihazlar vasitəsilə izlənilib. Nəticələr göstərib ki, gec yatan və yuxusu tez-tez bölünən insanlarda səhər yeməyindən sonra qan şəkərinin səviyyəsi daha yüksək ola bilər.
Lund Universitetinin professoru Pol Franks vurğulayıb ki, sağlam həyat tərzi düzgün qidalanma, fiziki fəaliyyət və keyfiyyətli yuxudan ibarətdir. Bu amillər bir-birini tamamlayır, lakin yuxu çatışmazlığını idman və ya xüsusi pəhrizlə tam kompensasiya etmək mümkün deyil.
Alimlər xəbərdarlıq edirlər ki, uzunmüddətli yuxu pozğunluqları qan şəkərinin tənzimlənməsinə mənfi təsir göstərərək 2-ci tip diabet və ürək-damar xəstəlikləri riskini artıra bilər.
Mütəxəssislər yuxu rejimi qeyri-müntəzəm olan şəxslərə səhər yeməyində şəkəri az olan qidalara üstünlük verməyi, təmizlənmiş karbohidratları məhdudlaşdırmağı və enerji içkilərindən uzaq durmağı tövsiyə edirlər.
Bununla belə, alimlər yuxusuz gecədən sonra fiziki fəaliyyətin qan şəkərinə təsirini və səhər yeməyinin bu prosesdəki rolunu müəyyənləşdirmək üçün əlavə araşdırmalara ehtiyac olduğunu bildirirlər.
Mütəxəssislərin fikrincə, müntəzəm və keyfiyyətli yuxu sağlam həyat tərzinin vacib hissəsidir və onun əhəmiyyətini nəzərdən qaçırmaq olmaz.
