Bəzi qidaların müntəzəm istehlakı xolesterinin yüksəlməsinə, qan təzyiqinin artmasına və ürək-damar xəstəlikləri riskinin çoxalmasına səbəb ola bilər.
Moderator.az “HuffPost”a istinadən xəbər verir ki, kardioloqlar ürək sağlamlığını qorumaq üçün məhdudlaşdırılması tövsiyə olunan bir sıra qidaların adını açıqlayıblar.
1. Qaraciyər
Kardioloq Eleonora Levin qaraciyərin yüksək xolesterol tərkibinə diqqət çəkir. Qidalı məhsul olsa da, qaraciyərin həddindən artıq istehlakı qanda xolesterol səviyyəsinin yüksəlməsi ilə bağlı narahatlıq yarada bilər. Yüksək xolesterol isə damarlarda lövhələrin yaranması, infarkt və insult riskinin artması ilə əlaqələndirilir.
2. Kolbasa və hot-doq
Kardioloq Elizabet Klodas səhər yeməyində kolbasa yeməkdən çəkinir. Bu məhsulların tərkibində çoxlu duz və doymuş yağ ola bilər. Həddindən artıq duz qan təzyiqini yüksəldə, doymuş yağlar isə “pis” xolesterolun səviyyəsini artıra bilər.
Bundan başqa, kolbasa və bekon kimi emal olunmuş ət məhsulları xərçəng riski ilə də əlaqələndirilir.
3. Marqarin
Bəzi marqarin növlərində olan trans yağlar “pis” xolesterolun (LDL) səviyyəsini yüksəldir, “yaxşı” xolesterolun (HDL) səviyyəsini isə azaldır. Bu da ürək-damar xəstəlikləri riskini artıra bilər.
Kardioloq Harmoni Reynolds marqarin əvəzinə zeytun yağı kimi daha sağlam alternativlərə üstünlük verməyi tövsiyə edir.
4. Yağlı qırmızı ət və bekon
Kardioloq Leonard Lilli yağlı qırmızı ətin, xüsusilə də yağlı biftek və bekonun müntəzəm istehlakının ürək-damar xəstəlikləri ilə yanaşı, diabet və bəzi xərçəng növlərinin riskini də artıra biləcəyini bildirir.
Bu məhsulların tərkibindəki doymuş yağlar, duz və bəzi qoruyucu maddələr ürək sağlamlığına mənfi təsir göstərə bilər.
5. Qızardılmış toyuq
Qızardılmış toyuq, xüsusilə çox yağda hazırlanan variantları, sağlam olmayan yağlarla zəngin ola bilər. Yağın dəfələrlə qızdırılması zamanı zərərli birləşmələr də yarana bilər.
Daha sağlam seçim üçün toyuğu qaynatmaq, sobada bişirmək və ya qrildə hazırlamaq məsləhət görülür.
6. Ponçiklər və digər şirniyyatlar
Ponçiklər yüksək şəkər və yağ tərkibinə görə ürək sağlamlığı baxımından arzuolunmaz qidalar sırasındadır. Onların hazırlanmasında istifadə olunan yağın tərkibindən asılı olaraq trans yağlar da ola bilər.
Bir ponçikdə 30 qrama qədər şəkər ola bilər. Həddindən artıq şəkər istehlakı piylənmə və 2-ci tip diabet riskini artırır. Bu problemlər isə ürək-damar xəstəliklərinin yaranmasına zəmin yarada bilər.
