Məşqdən əvvəl içilən bir fincan qəhvə dözümlülüyü və əzələ gücünü artıra, fiziki yükü daha asan keçirməyə kömək edə bilər.
 




Moderator.az “TODAY”ə istinadən xəbər verir ki, qəhvə məşqdən əvvəl istifadə oluna biləcək sadə və əlçatan içkilərdən biridir.
 
İdman öncəsi əlavə enerji əldə etmək üçün mütləq xüsusi idman əlavələri almaq lazım deyil. Dietoloq Natali Ritszonun sözlərinə görə, bu məqsədlə adi bir fincan qəhvə də kifayət edə bilər.
 
Qəhvənin məşqə təsiri nədir?
 
Mütəxəssis qeyd edir ki, qəhvənin əsas üstünlüyü onun tərkibindəki kofeinlə bağlıdır. Bu maddə bir çox idman əlavələrinin də tərkibində olur.
 
Kofein mərkəzi sinir sisteminə təsir edərək ayıqlığı artırır və fiziki yükün subyektiv olaraq daha yüngül hiss edilməsinə kömək edir. Bu səbəbdən intensiv məşq insana bir qədər asan görünə bilər.
 
Bundan əlavə, elmi məlumatlar kofein qəbulunun dözümlülük, əzələ gücü və partlayıcı güc göstəricilərinin yaxşılaşması ilə əlaqəli olduğunu göstərir.
 
“Qəhvə məşqdən əvvəl içməyi ən çox sevdiyim içkilərdən biridir”, – deyə Rizzo bildirib.
 
Qəhvəni məşqdən nə qədər əvvəl içmək lazımdır?
 
Mütəxəssis qəhvəni məşqə başlamazdan dərhal əvvəl içməyi məsləhət görmür. Kofeinin orqanizm tərəfindən mənimsənilməsi üçün müəyyən vaxt tələb olunur. Buna görə də içkini məşqdən təxminən 30–60 dəqiqə əvvəl qəbul etmək optimal hesab olunur.
 
Dietoloqun sözlərinə görə, təxminən 240 ml həcmində standart bir fincan qəhvənin tərkibində orta hesabla 100 mq kofein olur. Bu miqdar bəzi insanlarda nəzərəçarpacaq təsir göstərə bilər.
 
Qəhvə hər kəs üçün uyğundurmu?
 
Kofeinə reaksiya insandan insana dəyişir. Qəhvə içdikdən sonra əllərdə titrəmə, mədədə narahatlıq yaranırsa və ya yuxuya getmək çətinləşirsə, içkidən imtina etmək və ya daha az kofeinli variant seçmək məsləhətdir.
 
Qeyd edək ki, qəhvənin məşq zamanı faydası fərdi xüsusiyyətlərdən, qəbul edilən kofein miqdarından və məşqin növündən asılıdır.