"Rusiya "3+3" formatı (Azərbaycan, Gürcüstan, Ermənistan, Rusiya, Türkiyə və İran) çərçivəsində növbəti görüşün Azərbaycanda təşkil olunmasını mümkün hesab edir".
 




Moderator.az TASS-a istinadən xəbər verir ki, bu barədə Rusiyanın xarici işlər naziri Sergey Lavrov Bakıda keçirilən AQEM-in 7-ci Zirvə Görüşünün yekunlarına dair jurnalistlərə açıqlamasında bildirib.
 
"Azərbaycan və Türkiyə tərəfindən irəli sürülən "3+3" formatını xüsusi qeyd etmək istərdim. Bir neçə dəfə görüşmüşük və hazırda qrupun xarici işlər nazirlərinin növbəti toplantısına kimin ev sahibliyi edəcəyi barədə Ermənistanla Azərbaycanın razılığa gəlməsini gözləyirik", - deyə rusiyalı diplomat vurğulayıb.
 
O əlavə edib: "Hesab edirəm ki, ən yaxın görüşü Azərbaycanda, bir sonrakını isə İrəvanda keçirmək olar. Bu, doğru addım olardı".
 
Nazir bu platformanı xatırlatmasının səbəbini onun geniş əhatəli olması ilə əlaqələndirib: "O, ümumregion kontekstindən kənarda həyata keçirilməsi planlaşdırılan hər hansı tək bir layihəyə həsr olunmayıb. Buna görə də biz Azərbaycan və Türkiyənin təklif etdiyi "3+3" formatını fəal şəkildə dəstəkləyirik".