Yaş artdıqca orqanizmdə müxtəlif dəyişikliklər baş verir. Lakin bəzi əlamətləri sadəcə yaşlanma ilə əlaqələndirmək düzgün deyil. Xüsusilə qəfil yaranan, uzun müddət davam edən və getdikcə güclənən dəyişikliklər sağlamlıq probleminin göstəricisi ola bilər.
Moderator.az xarici mediaya istinadla xəbər verir ki, mütəxəssislər xüsusilə 50 yaşdan sonra diqqət yetirilməli olan bir neçə mühüm əlaməti açıqlayıblar.
1. Fiziki dözümlülüyün qəfil azalması
Əvvəllər rahatlıqla görülən gündəlik işlərin, pilləkən qalxmağın və ya adi gəzintinin birdən-birə çətinləşməsi diqqətdən yayınmamalıdır. Nəfəs darlığı və tez yorulma anemiya, ürək-damar və ya ağciyər problemləri ilə bağlı ola bilər.
2. Səbəbsiz çəki itkisi
Pəhrizdə və fiziki aktivlikdə dəyişiklik olmadığı halda bir neçə ay ərzində çəkinin davamlı azalması araşdırılmalıdır. Bu hal qalxanabənzər vəz problemləri, diabet, həzm sistemi xəstəlikləri və digər sağlamlıq pozuntuları ilə əlaqəli ola bilər.
3. Yuxuda ciddi dəyişikliklər
Gündüz davamlı yuxululuq, yüksək səslə xoruldama, gecə tez-tez oyanmaq və nəfəsin qısa müddətə dayanması yuxu apnesinin əlaməti ola bilər. Bu vəziyyət ürək-damar xəstəlikləri və yüksək təzyiq riskinin artması ilə əlaqələndirilir.
4. Ayaqlarda şişkinlik
Yeni yaranan və davamlı ayaq şişkinliyi də nəzərə alınmalıdır. Şişkinliyin səbəbləri müxtəlif olsa da, onun uzun müddət davam etməsi və ya artması tibbi müayinə tələb edə bilər.
5. Dəri və həzm sistemində dəyişikliklər
Dərinin həddindən artıq quruması və qaşınması, bağırsaq fəaliyyətində əvvəlkindən fərqli dəyişikliklər, eləcə də davamlı halsızlıq müxtəlif xəstəliklərlə bağlı ola bilər. Burada əsas məqam simptomların nə qədər davam etməsi və güclənib-güclənməməsidir.
6. Yaddaş və düşüncə qabiliyyətində dəyişikliklər
Ara-sıra unutqanlıq normal sayıla bilər. Lakin tanış yerlərdə istiqaməti itirmək, gündəlik maliyyə məsələlərini idarə etməkdə çətinlik çəkmək və eyni sualları dəfələrlə təkrarlamaq artıq sadəcə yaşlanma əlaməti kimi qəbul edilməməlidir.
Mütəxəssislərin fikrincə, əsas diqqət yeni yaranan və davamlı dəyişikliklərə yönəldilməlidir. Əgər hər hansı simptom bir neçə həftə davam edir, getdikcə ağırlaşır və gündəlik həyata təsir göstərirsə, səbəbin müəyyənləşdirilməsi üçün həkimə müraciət etmək məsləhətdir.
